14 yıl apis cezasına maküm etilgen qırımtatar uquq qorçalayıcısı Server Mustafayev sağlıq meseleleri ve Tambovnıñ 1-nci müstemlekesinde kerekli tibbiy yardımnı almağanını bildirdi. Onıñ bel ağrısı ve psoriaz alâmetleri peyda oldı, amma teşkerüvler endi eki ayğa qaldırıldı.
Bunı onıñ apayı Mayye Mustafayeva aqayınen uzun körüşüvden soñ bildirdi, dep "Qırım birdemligi" haber etti.
Siyasiy mabüsniñ aytqanına köre, onıñ bel ağrısı bar, onıñ içün onı nevropatologğa yolladılar. Neyropatologğa barğan soñ, oña ine uruvlar ve rentgen resmini yapmağa yazdırdılar, amma eki aydır teşkerüv yapılmay. Müstemlekede ekimlerniñ yetmemezligi sebebinden tibbiy yardım içün 5-8 ay beklemek kerek.
Bundan da ğayrı, siyasiy mabüsniñ yüzü ve qollarında teriniñ boşaluvı başlandı, bu ise psoriaznıñ başlanğıç basamağı ola bile. Hastalıqnıñ sebebi — telâş ve stres ola bile.
Mustafayev, siyasiy mabüs statusı sebebinden, müstemleke memuriyeti tarafından yapılğan ruhiy basqı aqqında da tarif etti.
"O, bulunğanı memuriyette, onıñ telükesizligi içün, oña daa sert yanaşalar. Yani, bir insan bir şey yapmasa bile, onı sadece fikirleri içün asılğan alda tutalar", — dep Mayye Mustafayeva tarif etti.
Mustafayevge alâ daa distantsion şekilde oquşqa izin berilmey, çünki o, 2024 senesi kiçik aydan berli SUSta (qattı közetüv sektorında) da buluna. Rusiye Adalet nazirligi muracaatnı red etti.
Mayye bildirdi ki, müstemlekede mahsulat ve kerekli mallarnıñ fiyatları arta, ayda 9,3 biñ rublelik sıñır ise yetmey. Bu sebepten Mustafayev Rusiye Adalet nazirligine muracaat etip, indeksatsiya yapmağa ve satın aluv sıñırını arttırmağa rica etti.
Aynı zamanda, o, oña qarşı cinaiy davalar açılğanı içün tutuluv şaraiti daa da fenalaşa, dep bildirdi. Aynı zamanda Mustafayevni evge yaqın bir müstemlekege avuştırmaq davasınıñ baqılması eñ yaqın vaqıtta başlanacaq. O, buña israr ete, çünki onıñ qorantası büyük para ve vaqıt masraf ete.
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Telegram, WhatsApp ve Facebookta Suspilne Qırım haberlerine abune oluñız
