Rusiye işğalcileri tarafından 13 yılğa maküm etilgen qırımtatar Servet Gaziyev Rusiye Federatsiyasınıñ Vladimir vilâyetindeki apishaneden etap etildi. Siyasiy mabüsniñ bulunğan yeri belli degil.
Bunı "Qırım birdemligi"ne adamnıñ tatası Svitlana Ablâmitova bildirdi.
Qadınnıñ aytqanına köre, qardaşınen soñki sefer 2024 senesi ilk qış ayınıñ başında bağlanğan edi. Bundan soñ o, onı "er angi vaqıtta apishaneden müstemlekege etap ete bileler", dep bildirdi.
"Birden onıñ esabına para yolladım, yolğa kerek olğan şeylerni alması içün. İlk qış ayınıñ 19-nda oña mektüp yazıp, para alıp-almağanını soradım, amma cevap kelmedi", — dep Svitlana Ablâmitova tarif etti.
O şunı da qoştı ki, qardaşına 2021 senesinde yaşağan qalp krizi ve psihiatrik hastahanede yaralanğanı sebebinden yazmağa qıyın olğanını tüşüne edi — o vaqıt onı zorbalıqnen saqqalını tıraş ettiler ve köpürçik kemigini bozdılar.
"Amma mektüp yoq edi. Qara qış ayında oña tekrar yazdım, qara qış ayınıñ 9-nda mektüp yolladım. Men bellesem, mektüpler bayram tatilleri sebebinden toqtatılğan edi. Qara qış ayınıñ 16-sına qadar bekledim, amma mektüp daa kelmedi. Soñra apishaneniñ muasebe idaresine telefon ettim. Olarda böyle bir mabüs yoq, dep cevap berdiler — onı etapqa yolladılar. Ne yerge, ne vaqıt onı yollağanlarını aytmadılar", — dep Ablâmitova qoştı.
Qara qış ayınıñ 28-nde Svitlana Rusiye federal Cezalandıruv hızmetine muracaat etip, qardaşınıñ bulunğan yerini bildirmege talap etti.
"Bir aydan berli onıñ bulunğan yerini bilmeyim, ondan haber de alamayım", — dep siyasiy mabüsniñ qardaşı qayd etti.
Telegram, WhatsApp ve Facebookta Suspilne Qırım haberlerine abune oluñız
