"Yevromaydan"nıñ faalcisi, siyasiy mabüs Andriy Kolomiyets Rusiye müstemlekesinde apis cezasını çekti. O, 10 yıl apishanede keçirdi.
Onıñ apayı Ğalına Kolomiyets Suspilne Qırımğa bunı bildirdi.
Al-azırda o, Rusiyeniñ Krasnodar ülkesindeki Gulkeviçi şeerinde sürgünlik merkezinde buluna.
"Ebet, apis müddeti bitti, amma şimdi onı sürgünlik merkezine alıp kettiler, ve anda ne qadar qalacağını bilmeymiz. O, video bağınen telefon etti, onen beraber sürgünlikte Herson şeerinden eki adam olğanını ayttı. Biri anda yıl sekiz ay, başqası eki buçuq yıl qala. Ümüt etem ki, Andriyniñ sürgünlik merkezinde bulunması bu qadar uzun sürmez", — dep Ğalına Kolomiyets tarif etti.
Hatırlatamız ki, 2016 senesi Kıyiv vilâyetiniñ sakini Andriy Kolomiyets Qırımda sert rejimli apishanede 10 yılğa maküm etildi. O, 2015 senesi mayıs ayında Rusiyeniñ Kabardino-Balkaristanda narkotik saqlağanında şübeli sayılıp tutuldı, Qırımğa ketirildi ve "Berkut" mahsus bölüginiñ eki Qırım hadimini öldürmek ıntıluvında qabaatlandı.
Kolomiyetsniñ adliyecisiniñ aytqanına köre, qabaatlavnıñ delillerinden tek eki qara-beyaz fotoresimi bar.
Telegram, WhatsApp ve Facebookta Suspilne Qırım haberlerine abune oluñız
