Rusiye esirliginden azat etilgen siyasiy mabüsler Nariman Celâl, Maksım Butkevıç ve Valeriy Ğorişniy ukrain diasporasınen Nyü-Yorkta körüştiler. Bu vaqia, Birleşken Milletlerniñ Havfsızlıq Şurasınıñ toplaşuvında iştirak etüv çerçivesinde İdare ştabınıñ vekilleri ve azat etilgen Kreml mabüsleriniñ AQȘa ziyareti çerçivesinde olıp keçti.
Arbiy esirlerniñ munasebetinen bağlı meseleler idare ştabında bu aqqında haber etildi.
Körüşüvde musafirler Rusiye tarafından halqara gumanitar uquqnıñ bozuluvı ve Ukraina arbiyleri ve vatandaşlarınıñ azapları aqqında aytıp, esirlik aqqında ikâyelerinen paylaştılar. Olar AQŞdaki ukrain cemiyetiniñ sesiniñ müimligini qayd ettiler, bu ise, Rusiyege bütün esirlerni azat etmesi içün halqara basqısına tesir ete bile.
İdare ştabınıñ Kâtibiyetiniñ yolbaşçısı Boğdan Ohrimenko ştabnıñ işini taqdim etip, ğayıp olğanlarnıñ qıdıruvı ve esirlerniñ azat etilmesi esnasında rastkelgen qıyınlıqlarnı añlattı. O şunı da qayd etti ki, diaspora halqara alanda ukrainlerniñ aqları oğrunda küreşte müim rol oynay.
Nariman Celâl aqqında ne bilemiz
Nariman Celâl — 2013 senesinden berli Qırımtatar Milliy Meclisiniñ reisiniñ birinci muavini.
Celial 2021 senesi berim ayınıñ 4-nde Yevpatoriyada (Kezlevde), Perevalne köyünde gaz borusını patlatqanında qabaatlanıp, işğalci akimiyet tarafından yaqalandı.
2022 senesi berim ayınıñ 21-nde Qırımnıñ işğalci Yuqarı mahkemesi onı 17 yıl sert rejimli koloniyada qalmasına, 700 biñ rublelik para cezasına ve 1,6 yıl areket serbestliginiñ sıñırlanmasına üküm etti.
2023 senesi bozarğan ayda Aqmescitteki SİZO memuriyeti tarafından Celâlnıñ bedeniy ve maneviy cezalandırılması aqqında belli oldı. 2023 senesi oktâbr ayınıñ başında onı Rusiye apishanesine avuştırdılar.
2024 senesi oraqnıñ 28-nde Nariman Celâl esir almaşuvı çerçivesinde Ukrainağa qaytarıldı.
2024 senesi ilk qış ayınıñ 20-nde Ukraina prezidenti Volodımır Zelenskıy Nariman Celâlnıñ Türkiyedeki Ukraina elçisi olacağını bildirdi.
Telegram, WhatsApp ve Facebookta Suspilne Qırım habelerine abune oluñız
