Doquz ay evelsi qırımtatar faalcisi Tofik Abdulazievniñ alı kritik edi: ayatı aman-aman qurşunğa tizilgen edi. Lâkin qorantasınıñ ğayretleri ve cemiyetniñ destegi sayesinde o yavaş-yavaş tedaviylenip başladı.
Onıñ apayı Aliye Abdulgazieva ilk qış ayınıñ 30-nda Facebookta bunı yazdı.
Çelâbinsk apishanesiniñ hastahanesinde bulunğan siyasiy mabüs Tofik Abdulgaziev aylarnen devam etken ağır küreşten soñ sağlıq vaziyeti bayağı eyileşkenini köstere.
"Aqayımnı körgende, onı tanımadım, o ise meni tanımadı, çünki onıñ alı fena edi. Amma adım-adım er kes Tofikke yardım etmek içün elimizden kelgenini yapa edik. Bir qaç afta, bir qaç ay keçti. Ve bugün, 9 aydan soñ, aqayım apishanede hastahanede buluna, ve er kün daa yahşı ola", — dedi Aliye.
O, Tofikniñ sağlıq vaziyeti aqqında soñki haberlernen paylaştı.
"Bugün aqayımnıñ ağırlığı 94 kilogrammğa arttı. Onıñ tili aman-aman tolusınen ğayrıdan tiklendi, o, eskisi kibi oldı. Men Allahnıñ küçüne ve onıñ sözüne daa bir kere inandım, eger Allah "Ol!" dese, o vaqıt olur", — dep qayd etti Aliye.
Siyasiy mabüsniñ apayı başqa siyasiy mabüslerniñ ailelerine de muracaat etip, ümütni coymamağa ve imanğa esaslanmağa çağırdı. O, qırımtatar cemiyetine qol tutqanı ve duaları içün minnetdarlığını bildirdi, onıñ aytqanına köre, bu eñ qıyın vaqıtlarda dayanmağa yardım etti.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Telegram, WhatsApp ve Facebookta Suspilne Qırım haberlerine abune oluñız
