Ukraina jurnalistleriniñ milliy birligi "Qırımda aqiqat üzerinde makeme: Rusiye repressiyalarına oğrağan 20 ukrain jurnalistiniñ ikâyeleri" adlı mahsus yayınnı çıqardı. Bu, işğal etilgen yarımadada jurnalistlerge qarşı cinaiy davalarnıñ uydurılğanını kösterecek ilk tedqiqattır.
İlk qış ayınıñ 24-nde Ukraina jurnalistleriniñ milliy birliginiñ matbuat hızmeti bu aqqında haber etti.
"Bu cıyıntıq — Qırımdaki ihtisasiy ve vatandaş jurnalistlerine qarşı sahte davalarnıñ tafsilâtlı uquq qorçalayıcı talilini yapqan ukrain jurnalistleri, UJMBniñ azaları ve mütehassıslarnıñ çoq aylıq işiniñ neticesidir", — dep qayd etti UJMBniñ reisi Serğiy Tomilenko.
Neşirniñ azırlanuvınıñ idarecisi UJMBniñ kâtibi, özü de Rusiye akimiyeti tarafından taqip etilgen qırım jurnalisti Mıkola Semena oldı.
Neşir 20 jurnalistniñ ikâyelerini taqdim ete, olarnıñ arasında Asan Ahtemov, Nariman Memedeminov, Remzi Bekirov, Vladıslav Yesıpenko, Nariman Celâl, İrına Danılovıç ve başqaları bar. Er biri zenaat faaliyeti sebebinden taqipke oğradı. İşğalciler olarnı "terrorizm", "casuslıq" ve başqa uydurılğan cinayetlerde qabaatladılar.
"Böyle taqiplerniñ çoqusı içün işğalli akimiyet uydurılğan sebepler ve sahte delillerni qullana, sıq-sıq apiske alınğan jurnalistlerden zorbalıq ve işkence altında elde etile", — dep añlattı uquq qorçalayıcı Darya Svırıdova. "İşğal altındaki vatandaşlarımız içün er angi sadıqsızlıqnı bedeniy telükege oğratıp, Rusiye Qırım yarımadasında mustaqil jurnalistika ve uquq qorçalayıcılıqnı aman-aman yoq etti".
Telegram, WhatsApp ve Facebookta Suspilne Qırım haberlerine abune oluñız
