İlk qış ayınıñ 25-ne keçer gecesi Rusiye ava mudafaası 59 ukrain uçucısız uçaq aletini (UUA) urdı. Olardan biri Azaq deñiziniñ üzerinde tüşürildi.
Bunı Rusiye Mudafaa nazirliginiñ matbuat hızmeti bildirdi.
"26 uçucısız uçaq aleti Belgorod vilâyetiniñ üzerinde, 23 — Voronej vilâyetiniñ üzerinde, üçer UUA — Kursk, Brânsk ve Tambov vilâyetleriniñ üzerinde, ve bir Azaq deñiziniñ üzerinde uruldı", — dep bildirildi.
Hatırlatamız ki, ilk qış ayınıñ 25-nci sabası Rusiye orduları çeşit çeşit raketalar qullanıp, Ukrainağa kütleviy ücüm ettiler. Patlamalar Dnipropetrovsk, Harkiv ve İvano-Frankivsk vilâyetlerinde ve başqa bölgelerde yüz berdi. Ücüm neticesinde elektrik stantsiyalarınıñ donatmaları zararlandı, yaralanğanlar bar.
Telegram, WhatsApp ve Facebookta Suspilne Qırım haberlerine abune oluñız
