Vaqtınca işğal etilgen Qırım, 2024 senesi devamında Rusiyede yasaq etilgen "Yehova şaatları" diniy teşkilâtınıñ azalarını qıdıruvlar boyunca lider ola. Yarımada, teşkilâtta iştirak etkeni içün apis cezasınıñ ortalama müddeti boyunca liderlerden biri ola — 6 yıl.
Teşkilâtnıñ matbuat hızmetine atfı etip Qırım.Aqiqat bunı bildirdi.
"Yılnıñ başından berli Rusiye quvetçileri eñ azından 96 kere Yehova Şaatleriniñ evlerinde tintüvler keçirdiler, eñ çoq — 17 kere — Qırımda. Umumen, bütün bu yıllar devamında yapılğan reydlerniñ sayısı 2157 oldı", — dep aytıla haberde.
O şunı da qoştı ki, Rusiye ve onıñ tarafından işğal etilgen topraqlarda bir yıl içinde 41 insan yañı cinaiy davalarnıñ mabüsleri oldı, olardan 19-ı apiske alındı, 15-i alâ daa apiste buluna. Keçken sene 100 din adamına qarşı cinaiy dava tizildi.
Hatırlatamız ki, 2017 senesi Rusiye Yuqarı makemesi "Yehova şaatları" diniy teşkilâtını aşırıcı olaraq tanıp, onıñ faaliyetini Rusiye Federatsiyasında ve işğal etilgen Qırımda yasaq etti. Buña baqmadan, "Yehova Şaatleri"niñ faaliyeti dünyanıñ memleketleriniñ çoqusında qanuniy olaraq tanıla.
"Din nezaret altında" adlı tsiklniñ üçünci sanında Suspilne Qırım, Rusiyeniñ işğal etilgen Qırımda "Yehova şaatları"nı nasıl ve ne içün taqip etkenini añlata.
Telegram, WhatsApp ve Facebookta Suspilne Qırım haberlerine abune oluñız
