İşğal etilgen Canköyde birinci derece saqatlığı olğan kör sakin İğor Nikitenkoğa "makeme" Rusiye polisiniñ şahsiy malümatlarını toplav ve tarqatma maddesine binaen 40 biñ ruble16 biñ ğrıvnâ para cezasını berdi (Rusiye Federatsiyasınıñ Memuriy cinayetler qanunnamesiniñ 17.13maddesiniñ 2-nci qısmı).
İlk qış ayınıñ 19-nda mustaqil uquq qorçalayıcı media leyhası "OVD-Info", advokat Emil Kurbedinovğa atıf etip bunı bildirdi.
"Ükümge binaen, Nikitenko VKontaktedeki "Küçük Qırımdaki çatışmalar" gruppasında bir qaç polis hadiminiñ malümatını aydınlattı. O, quvetçilerniñ fotoresimlerini, soyadlarını, adlarını, iş yerlerini, vazifelerini ve doğğan künlerini derc etti. Cezanı Aqmescitniñ (Simferopolniñ) Kıyiv makemesiniñ 10 bölüginiñ "halqara makemecisi" berdi", — dep bildirildi.
Hatırlatamız ki, orta küz ayınıñ 30-nda Rusiye quvetçileri İğor Nikitenkonı eviniñ yanında tuttılar. Onıñ aytqanına köre, apiske alınğan vaqıt onı urdılar, cep telefonını aldılar. Polis hadimleri işkencege qullandılar, vefat etken apayı aqqında şaqa ettiler, ve "ayaqyol yerine ştanlarını qullanmağa" teklif etip, onı kene de ayaqyolğa alıp ketmediler.
Bundan soñ, tibbiy yardım kösterilmesini istegenine baqmadan, mabüsni makemege alıp kettiler. Neticesinde, oturış keçirilmedi, çünki "acele yardım" çağırılmaq kerek edi. Hastahanede ekimler Nikitenkonıñ köteklengenini qayd ettiler.
Telegram, WhatsApp ve Facebookta Suspilne Qırım haberlerine abune oluñız
