Rusiye quvetçiler "Qırım ve Aqyardaki musulmanlarınıñ ruhiy idaresiniñ" (QAMSİ) nezareti astında olmağan din terkibi olğan "Tavriya müftiyatınıñ" daa bir din mektebini qapattılar.
Bunıñ aqqında Qırım.Aqiqat bildire.
Mektepniñ qapatuvı, "Tavriya müftiyatına" nevbetteki basqı vaqiası olğan. Vaqianı öz adını aytmayıp tefsir etmege razı olğan qırım uquq qoruyıcılarından biriniñ sözlerine köre, "Tavriya müftiyatına" dair uquqiy sıñırsızlığı oluna".
"Mekteplerni qapatalar, Kezlevdeki Cuma Camini çekip almağa tırışalar. "Tavriya müftiyatınıñ" musulmanları Rusiye prezidenti Putin ve Qırımnıñ rusiye başı Aksönovğa "Tavriya müftiyatınıñ" terkiplerine taqip etüvlerini toqtatmağa ricasınen muracaat ettiler. Olarnıñ fikirine köre, episiniñ artından QAMSİ müftiyi Emirali Ablayevniñ Qırım musulmanları üzerinde nezaretni kerginleşip öz tesirini artmağa ıntıluvı tura", – qayd etti uquq qoruyıcı.
Aynı zamanda QAMSİ-de er bir taqip etüvine öz alâqasını red eteler.
"Soñki künler içinde içtimaiy ağlarda özüni "Tavriya müftiyatınıñ" vekilleri dep adlağan bazı vatandaşlarınıñ video muracaatları tarqatılğan. Qırım Cumhuriyeti ve Aqyar şeerdeki musulmanlarnıñ ruhiy idaresi, video muracaatında iştirak etken vatandaşlarına ve olarnıñ sektalı faaliyetine ve meselelerine iç bir alâqası olmağanını bütün mesüliyetinen bildire. Qırım Müftiyatınıñ adresine bildirilgen bütün qabaatlavlar yalandır", – denile QAMSİ-niñ resmiy idaresinde.
Telegram, WhatsApp ve Facebookta Suspilne Qırım haberlerine abune oluñız
