Rusiye makemesi tarafından "USQni maliye etkeni" içün yedi senege maküm etilgen eñ genç Qırım siyasiy mabüsi Appaz Kurtametniñ etabı yekünlendi. Şimdi o, Pskov vilâyetindeki müstemlekede buluna.
Onıñ anası Ayşe Kurtamet Facebookta bu aqqında haber etti.
"Bugün bizge Appazdan haber keldi — o, azatlıqqa çıqqanına qadar qalacaq lagerge keldi. Şimdi onıñ adresi İK-6, Pskov vilâyeti", — dep yazdı o.
Ayşe Kurtamet, oğlunıñ, hususan, gençlikniñ qıyın devirinde, onıñ içün qonuşuvnıñ müimligini qayd ete. O, Appazğa yañı adresine mektüpler yazmağa ya da onıñ oğluna bermesi içün olarnı şahsen oña yollamağa çağıra.
"Appaz daa pek genç, ve o, şimdi, gençlikniñ eñ ağır yıllarında, insanlarnen qonuşmağa istey. O, bizim tevsiyelerimizge emiyet bere ve yazğan er keske minnetdar", — dep qayd ete Ayşe Kurtamet.
Appaz Kurtametniñ tutulması aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp ve Facebookta Suspilne Qırım haberlerine abune oluñız
