Avropa parlamenti, Rusiyeniñ Qırımnıñ 11 yıllıq işğali, insan aqlarınıñ bozuluvını takbih etken ve Qırımdaki siyasiy mabüslerniñ deral azat etilmesini talap etken rezolütsiyanı qabul etti. Vesiqa Qırım platformasınıñ işini de destekley.
Bunı Ukraina prezidentiniñ Qırım Muhtar Cumhuriyetindeki temsilciligi bildirdi.
İlk qış ayınıñ 19-nda Avropa parlamenti "Qırım Muhtar Cumhuriyeti ve Aqyar (Sevastopol) şeeriniñ Rusiye Federatsiyası tarafından işğaliniñ 11-inci yılı ve işğal etilgen Qırımda hususan İrına Danıloviç, Tofik Abdulgaziyev ve Amet Süleymanov davalarında insan aqları vaziyetiniñ fenalaşması" adlı rezolütsiyanı qabul etti.
Vesiqada Qırımnıñ qanunsız işğali, insan aqlarınıñ muntazam bozuluvı ve Rusiyeniñ qırımtatarlarnıñ kimligi, medeniyeti ve mirasını yoq etmege tırışqan areketleri takbih etile. Qarar ukrain halqına ve Qırım platformasınıñ Ofisiniñ faaliyetine qol tutuvnıñ müim bir işareti oldı.
Qırım siyasiy mabüsleriniñ ağır vaziyetine diqqat ayırıldı. Avropa parlamenti, jurnalist İrına Danılovıç, faal Tofik Abdulgaziyev, jurnalist Amet Süleymanov ve başqa mabüslerniñ azat etilmesini talap etti.
Rezolütsiya qırımtatarlarnıñ, qavmiy ukrainlerniñ ve başqa azlıqlarnıñ mecburiy pasportlaştırıluvını, ruslaştırıluvını ve sistematik taqiplerini takbih ete. Vesiqada Avropa Birliginiñ memleketlerine insan aqlarınıñ bozuluvı ve Qırımnıñ işğaline alâqası olğan şahıs ve teşkilâtlarğa qarşı sanktsiyalarnı sertleştirmege çağırdı. Qırım platformasına qol tutuv yarımadanıñ işğalden azat etilmesi içün küreşniñ devam etmesi içün müim tanıldı.
Telegram, WhatsApp ve Facebookta Suspilne Qırım haberlerine abune oluñız
