Qırımnıñ işğalli akimiyeti ilk qış ayınıñ 17-nden başlap yarımadada mobil internetniñ söndürilüvi aqqında bildirdi. İhtimal etilgen sebeplerden biri — Ukraina mahsus hızmetlerine RF arbiy tehnikası aqqında malümatnı tez vaqıtta bermemektir.
Suspilne Qırımğa Ukraina havfsızlıq hızmetiniñ sabıq hadimi, arbiy mütehassıs İvan Stupak bunı bildirdi.
O, bütün Qırımnıñ bağını kesmeyceklerini qayd etti. Onıñ içün aşağıdaki algoritmlerni qullanmaq mümkün.
Birinciden, mütehassısnıñ fikrine köre, mobil internetniñ toqtatıluvı ola bile, meselâ, saat 23:00ten 07:00ge qadar, yerli SIM-kartlarnı qullanıp, ukrain dronlarına belli bir maqsadlarğa uçmağa imkân bermemek içün.
Sabıq UHHniñ hadimi hatırlattı ki, bundan evel Rusiye Smolensk vilâyetinde Moskva yönelişinde böyle yapqan edi. Ruslar 4G-den 3G-ge qadar malümat berüv hızmetini sıñırladılar, yani uçucısız aletniñ yönelişini belgilemege imkân yoq edi. Soñra telefon qullesi deñişmege yetişmey ediler, ve dron tüşe, yönelişi bozula edi.
Ekinciden, Stupaknıñ qayd etkenine köre, Qırımda bazı yerlerde yoldaş bağını söndürmek mümkün. Şu cümleden, büyük gemilerniñ limanğa kirişinde, olarnı toldurmaq ve tamir etmek içün, tehnikiy hızmetlerniñ yoldai bağı bütünley söndürildi.
"Olarnıñ (ruslar — muar.) aytqanları kibi, gizli bağ qala. Bular Sovetler Birligi zamanından qalğan tel telefonlarıdır. Ve cep telefonları çalışmay. Ne içün? Yaqında bulunğan ve Ukraina tarafını tutqan insanlar, misal içün, böyle geminiñ limanga kirmesini videoğa çıqarıp, foto çıqarıp, telükesiz bağ kanalları vastasınen Ukrainağa SMS yollap, Ukrainağa tez bir zamanda ücüm etip olamasın dep. Yani, bir çeşit profilaktik tedbir", — dep tarif etti arbiy mütehassıs.
O, işğalcilerniñ böyle bir tedbirini misal olaraq ketirdi — uçaq "Belbek" ava limanında otura, amma 3 kilometr radiusında iç bir şey çalışmay. Bu uçaqnı körgen ve Ukrainağa malümat bermek istegen er kes bunı yapamaz, çünki bağ yoq.
Hatırlatamız ki, işğalli Qırım malümat nazirligi ilk qış ayınıñ 17-nden başlap yarımadada mobil internet söndürile bilgenini bildirdi. Bu, bütün Qırım operatorlarına, şu cümleden, Rusiyeniñ qıtaiy qısmında ve Ukrainanıñ vaqtınca işğal etilgen topraqlarında çalışqan operatorlarğa ait olacaq.
Telegram, WhatsApp ve Facebookta Suspilne Qırım haberlerine abune oluñız
