Uquq qorçalayıcı teşkilâtlar Rusiye Federatsiyasınıñ vaqtınca işğali altında bulunğan Ukraina vatandaşlarına qoltutmağa çağırdılar. Olar devletni VİETdaki ukrainlernen bağ qurmaq içün muayyen adımlar atmağa çağırdılar. Vesiqanı sekiz uquq qorçalayıcı teşkilât imzaladı.
Bunı ZMINA insan aqları merkezi ilk qış ayınıñ 13-nde bildirdi.
"Qırım Muhtar Cumhuriyeti, Donetsk, Zaporijjâ, Luğansk ve Herson vilâyetleriniñ bir qısmı istilâcı memleket tarafından uzun müddet devamında işğal astındadır. Aynı zamanda bu Ukraina topraqlarında işğal şaraitinde er kün sabır ve azatlıqqa inanğan ukrain vatandaşları yaşamağa devam eteler", — dep bildirildi.
Uquq qorçalayıcılar "Ukraina cemiyetiniñ milliy birligini temin etmek ve qorumaq içün devletniñ areketleriniñ müimligi"ni qayd eteler.
"Devlet, vaqtınca işğal etilgen topraqlarda yaşağan Ukraina vatandaşlarınen bağlarını pekitmek içün çalışmaq kerek", — dep qayd eteler uquq qorçalayıcılar.
İşğal altında bulunğan insanlarğa destek köstermek içün devletke tevsiyeler de derc etildi, şu cümleden:
- Ukraina ükümetinde VİET ve sakinlerniñ destegi ve reintegratsiyasına dair devlet siyasetini şekillendirmek ve yerine ketirmek içün mesüliyetli bir organ tayin etilmeli. Bu müessise öz vazifelerini eda etmek içün bütün kerekli resurslarğa (insan, maddiy ve ilâhre) saip olmalı;
- vaqtınca işğal etilgen topraqlardan çıqqan balalar ve gençler içün destek programmaları azırlanılmalı ve yerine ketirilmeli, böyle destek pasport vesiqalarını resmiyleştirüvde yardım, vaqtınca yaşayış, tasil aluv, ruhiy yardım, maliyeviy destek ve ilâhrenen bağlı olmalı;
- Ukraina nezareti altında bulunğan topraqlarda eali içün menfiy aqibetlerniñ ve olarnıñ aqlarınıñ temin etmek imkânlarınıñ yoq etilmesi içün işğalli akimiyet organları tarafından berilgen vesiqalardan alınğan malümatnıñ qullanıluvı içün mehanizmler işlep çıqarılmalı. Birinciden, makeme ögünden tış, vatandaş vaziyeti vesiqaları, tibbiy vesiqalar, mülkiyet aqqı vesiqaları ve ilâhre malümatnı qullanuv usullarını kirsetmek kerek;
- devletniñ DAKlerge nisbeten siyaseti ardı-sıra, tahmin etile bilecek olmalı ve olarnıñ ihtiyaclarınıñ qıymetlendirüvine esaslanğan kerçek destek tedbirlerini teşkil etmeli.
"Ukraina cemiyeti ukrain halqınıñ işğalde dayanıqlığını desteklemege ve vatandaşlarımızğa er taraflama destek köstermek kerek. Devletimizniñ sesi Rusiye teşviqatından daa küçlü olmalı. Ukraina vatandaşları bizni bu topraqlarda beklegende, Ukrainanıñ suveren topraqlarına aqqımız tek quvetleşe", — dep yekünledi uquq qorçalayıcılar.
Metinni ZMINA insan aqları merkezi, "Stabilization Support Services" HF HT, "Qoruv aqqı" HF, "Shid SOS" HF, "ĞRUPA VPLIVU" cemaat holdingi" cemaat teşkilâtı, "Qırım SOS" cemaat teşkilâtı, "Donbağs SOS" cemaat teşkilâtı, Qırım uquqq qorçalayıcı gruppası imzaladılar.
Telegram, WhatsApp ve Facebookta Suspilne Qırım haberlerine abune oluñız
