Qırımtatar asıllı ukrain yırcısı Jamalanıñ "ARAFAT DAĞINDAN" yırına çıqarılğan klip Megogo Music Awards 2024niñ tüşüncesine köre, yıl klipi oldı. Videonıñ rejissörı, aynı zamanda Liverpulda "Eurovision-2023" yarışınıñ icadiy müdiri olğan Ğerman Nenov oldı.
Jamala Facebook saifesinde bunı bildirdi.
"Bu videonıñ böyle dürüst, da pek yahşı rejissörlar çıqarğan böyle samimiyetnen pop-hitlernen yarışması — bu inanılmaz bir vaqia. Bu tek menim içün degil de, umumen ukrain muzıkası içün bir vaqia, çünki bu yır qırımtatar tilinde, ve bu yır iç bir yapma aletnen yazılmağan, 6.28 daqqalı yırdır. Yani, bu kerçekten tam bir vaqia. Yaratuv işinde çalışqan bütün taqımğa teşekkürlerimni bildirem", — dep yazdı yırcı.
Teşkilâtçılarnıñ qayd etkenine köre, neticeler diñleyicilerniñ berüvleri (25%-i), diñleyicilerniñ reyleri (25%-i) ve jüri qıymetleri (50%-i) esapqa alınğan formulağa köre belgilendi.
"ARAFAT DAĞINDAN — Simferopolnıñ (Aqmescitniñ) qadimiy türküdir, altı daqqalı klip ise qırımtatar halqınıñ tarihına ve Jamalanıñ şahsiy tarihına esaslana", — dep yazdı Megogo.
Hatırlatamız ki, keçenlerde Jamala, yırcı Monatiknen beraber icra etken "Klıçu" (''Çağıram'') yırınıñ yañı klipini çıqarıp taqdim etti.
Telegram, WhatsApp ve Facebookta Suspilne Qırım haberlerine abune oluñız
