Qırımnıñ Geniçesk rayonında Rusiye ordusı tarafından işğal etilgen Novooleksiyivka qasabasında yaşağan 65 yaşındaki Cefer Ablâmitovnıñ evine silâlı insanlar kirip, adamnı ve onıñ şahsiy eşyalarını hırsızladılar. Vaqia boş aynıñ 19-nda olıp keçti, lâkin onıñ aqqında ilk qış ayınıñ 11-nde belli oldı. Ablâmitovnıñ tuvğanları alâ daa onıñ bulunğan yerini bilmeyler.
Qırımtatar Milliy Meclisiniñ reisi Refat Çubarov Suspilne Qırım içün bu malümatnı tasdıqladı.
Onıñ aytqanına köre, Ablâmitovnıñ evine altı silâlı adam keldi, olarnıñ maşnalarınıñ nomeraları yoq edi. Adamnı ve onıñ şahsiy eşyalarını alıp kettiler. Ablâmitovnıñ qorantası, boş aynıñ 19-nda olıp keçkenlerniñ tafsilâtlarını qayd etip, ğayıp oluv aqqında ariza yazdılar ve vesiqanı "bölükniñ polisi"ne yolladılar. Amma bunıñ neticesi olmadı.
"Bu vaziyetniñ dramatikligini daa bir şey qoşa: Cafer Ablâmitovnıñ hronik yürek hastalığı bar, ve onıñ ayatı telüke astındadır. Qırımdaki er keske muracaat: Aqmescit SİZOnda ve Çonğarda bulunğan siyasiy mabüslerniñ adliyecileri ve soy-sopları vastasınen Cafer Ablâmitov aqqında sorañız. Evel böyle etip, Rusiye cezalandırıcıları tarafından hırsızlanğan insanlarnıñ bulunğan yerini belgiley edik", — dep yazdı Refat Çubarov Facebook saifesinde.
O şunı da qoştı ki, eger de evge Rusiye quvetçileri kirseler, bunıñ aqqında malümat açıq olması içün er şey yapmaq kerek.
"Mında bütün tafsilâtlar müimdir: kim, ne vaqıt ve nasıl etip eviñize kirdi, nasıl areket etti, tintüvniñ neticeleri ne oldı. Advokatlarıñız olmasa, bir şey imzalamañız, amma eñ esası — Rusiye cezalayıcıları tarafından apiske alınğan semetdeşleriñiz aqqında deral haber etiñiz. Böyle etip, qanunsız apiske alınğan ya da hırsızlanğan insanlarnıñ vaziyetini eyileştirirsiñiz. Olarnıñ ayatlarını qurtarmaq mümkün", — dep qayd etti Qırımtatar Milliy Meclisiniñ reisi.
Telegram, WhatsApp ve Facebookta Suspilne Qırım haberlerine abune oluñız
