“Serbest Qırımğa mektüpler” teşebbüsi çerçivesinde ukrain yırcısı Jamala, siyasiy mabüs Ğalına Dovğopolanıñ mektübini oqudı. Qırım sakini işğalciler tarafından “devlet hainligi”nde qabaatlanıp, 12 senege maküm etildi.
Ukraina Prezidentiniñ Qırım MCdeki Temsilciligi Telegram kanalında videonı yayınladı.
"Ğalına davası tamamınen uydurıldı — kerçekten de pensiyacı siyasiy sebeplerden taqip etile. Qadın Qırımnıñ Rusiye işğaline qarşı çıqqan edi ve Ukrainanıñ kontrol etken topraqlarında faaliyet köstergen ukrain göñülli teşkilâtlarınen bağ tutqan edi", — dep aytıla haberde.
Şimdi 69 yaşındaki siyasiy mabüs Rusiye Federatsiyasınıñ Vladimir vilâyetindeki apishanede buluna ve apishaneniñ ağır şaraiti ve tibbiy yardımnıñ olmağanına şikâyet ete. O, Rusiyede tutulğan eñ eski siyasiy mabüslerden biridir.
Hatırlatamız ki, Qırım sakini Ğalına Dovğopolanı 2019 senesi boş ayda "devlet hainligi"nde şübeli sayıp tuttılar. Boş aynıñ 27-nde Sevastopolnıñ (Aqyarnıñ) qanunsız "Lenin rayon makemesi" onı apiske aldı. O, Moskvadaki "Lefortovo" SİZOa çıqarıldı, 2021 senesiniñ başında ise Aqmescit SİZOa qaytarıldı.
2021 senesi saban ayınıñ 24-nde "Sevastopol şeer makemesi" Dovğopolanı umumiy rejimli müstemlekede 12 senege maküm etti ve bir senege azatlıqtan marum etti.
Qadınnı "Ukraina Mudafaa nazirliginiñ Baş istihbarat idaresinen gizli işbirlikte bulunıp, istihbarat vazifelerini eda etkeni"nde ve sanki devlet sırı olğan Qara deñiz flotunıñ ayrı aviatsiya polkunıñ malümatını toplağanında qabaatladılar.
Telegram, WhatsApp ve Facebookta Suspilne Qırım haberlerine abune oluñız
