Mariya Tomak üç yıl çalışqan Qırım platformasınıñ faaliyetini temin etüv hızmetiniñ reberi vazifesinden çıqtı.
İlk qış ayınıñ 6-nda o, Facebook saifesinde bu aqqında haber etti.
Tomak, zenaatdaşlarınen Qırımnıñ halqara kün tertibinde qalması içün "er şeyni yapqanlarını" qayd etti.
"İnanmağa isteyim (ve bazı allarda — bilem) ki, ortaqlarımız ve zenaatdaşlarımıznıñ çoqusı içün Qırımnıñ kerçek yüzüni açmağa, onı Rusiye teşviqatından temizlemege, Qırımnı ve umumen Ukrainanı dünyanen birleştirgen yañı ikâyelerni teklif etmege imkân oldı", — dep yazdı o.
Tomaknıñ aytqanına köre, halqara tedbirlerniñ keçirilmesine çoq küç ve resurs sarf etmege devam etmek kerek, olarnıñ maqsadı — dünya Qırım on yıldan çoq işğal etilgenini, anda qırımtatarlarğa, ukrainlerge qarşı siyasiy taqipler devam etkenini, Qırımnıñ Rusiye tarafından kene arbiy bazağa çevirilgenini hatırlasın.
"Ve, belki de, (dünya — muar.) Rusiye devletçiligi, özüni nasıl adlandırsa ve nasıl bir fiqur yaprağı ile gizlese de, imperiyalı ve zorbalıq esasları aqqında daa bir dersini ögrene", — dep qoştı o.
Mariya Tomak qayd etti ki, o azırlanmasında iştirak etken Qırım platformasınıñ eñ yüksek seviyedeki sammitleri "müim bir saifesi oldı".
"Amma canım içün eñ qıymetli şey — onıñ yardımınen biz Global Cenüpnen Ukraina Cenübi vastasınen qonuşmağa tırışqanımız Qırım Global konferentsiyası. Men bunı semereli dep sayam. Ümüt etem ki, bu teşebbüs bir şekilde devam etecek", — dep qoştı o.
Telegram, WhatsApp ve Facebookta Suspilne Qırım haberlerine abune oluñız
