Rusiye temsilcileri qırımtatar halqınıñ vekilleri, siyasiy mabüsler meselelerini muzakere etmege pek istemeyler. Ukraina bu meselede Türkiyenen daimiy bağda buluna, işğal etilgen Qırımdan ukrain siyasiy mabüslerini deñiştirmek içün yañı aracılarnı ve Rusiyege qarşı yañı basqı mehanizmlerini qıdıra.
Bunı Ukraina Yuqarı Şurasınıñ insan aqları vekâletlisi Dmıtro Lubinets, ilk qış ayınıñ 5-nde Kıyivde olıp keçken "On yıl 2014-2024. İnsan aqlarını qorçalap. Demokratiyanı saqlap qalmaq" halqara uquq qorçalayıcı konferentsiyasında bildirdi, dep Suspilne mühbiri haber etti.
"Men, Rusiye Federatsiyasınıñ temsilcilerinen doğrudan-doğru qonuşqan vaqıt, olar 2014 senesinden berli ukrain Qırımında tutulğan qırımtatar halqınıñ vekilleri, siyasiy mabüsler meselesini muzakere etmege istemeyler", — dep qayd etti o.
Ukraina ombudsmanınıñ aytqanına köre, siyasiy mabüslerni qaytaruv meselesinde Türkiye "pek yardım ete".
"Men şahsen Türkiyege bir qaç kere bardım, Türkiye prezidenti Erdoğannen körüştim. Türkiye ombudsmanı biznen daima bağda buluna. Çoq şey aytıp olamayım, amma bu memleket pek çoq şey yapqanını tasdıqlay bilem, ve siyasiy mabüslerni (qısımlarını — muar.) qaytaruv meselesi köterildi", — dep qayd etti Lubinec.
Onıñ bildirgenine köre, al-azırda Qırımda 218 siyasiy mabüs bar. "Bir qaç adam" qaytarıldı.
Öz tarafından Ukraina, em yañı aracılar, em de Kremlniñ mabüslerine nisbeten Rusiyege qarşı basqı yapmaq içün yañı mehanizmlernı qıdırmağa devam ete, em de dünyağa ukrain siyasiy mabüsleriniñ aqlarınıñ bozuluvı aqqında haberdar etmege devam ete, dep qoştı ombudsman.
"Biz atta ayrı malümat brifİşbirlik yapmağa azır olğan taraflar arasında bütün esas parametrlerni yazıp alğan añlaşmaini azırladıq, onı Qırım platforması sammitinde Kıyivge kelgen pek çoq memleketniñ vekillerine berdik, o vaqıt men zenaatdaşlarımnen ukrain Qırımınıñ Rusiye Federatsiyası tarafından qanunsız işğali meselesinde onlayn munaqaşalar teşkil etken edim", — dep qayd etti o.
Telegram, WhatsApp ve Facebookta Suspilne Qırım haberlerine abune oluñız
