Boş aynıñ 28-nde Qırım "diversantları davası"nıñ mabüsi Volodımır Ananyevniñ apis müddeti 2 ayğa uzatıldı. Oña daa bir qabaatlayıcı maddeni qoştılar - Rusiye Ceza qanunnamesiniñ 205.1 maddesi (terakt yapmaq içün azırlanmağa yardım).
Boş aynıñ 29-nda Qırım uquq qorçalayıcı gruppası Ananyevniñ tuvğanlarına esaslanıp bunı bildirdi.
"Volodımır Ananyev Qırımnıñ cemaat erbabı edi, uquqiy ve publitsistik faaliyetnen oğraşqan, topraq islâatında faal iştirak etken, topraq saipleriniñ aqlarını qorçalağan edi", - dep bildire QUQG.
Hatırlatamız ki, 2024 senesi kiçik ayda FSB, işğal etilgen Qırımda UHHniñ emirinen maşna patlavını azırlağan üç kişiden ibaret gruppanı tutqanını bildirdi. Yaqalanğanlar arasında işğalli kütleviy haber vastaları Şevçenko adlı qadın ve Bodnar V. A. ve Ananyev V. V. adlı eki erkekni adlandırdılar.
Kiçik aynıñ 5-nde işğalli makeme Volodımır Ananyevni apiske aldı. Erkekni RFnıñ Ceza qanunanmesiniñ 222.1 maddesine (Patlayıcı maddelerni qanunsız satın aluv, berüv, satıluv, saqlav, taşuv ya da yanına aluv) binaen qabaatlı şübeleyler.
Telegram, WhatsApp ve Facebookta Suspilne Qırım haberlerine abune oluñız
