Herson vilâyetiniñ Çaplınka köyüniñ sakini, siyasiy mabüs Volodımır Yakımenko bir yıldır Rusiye tarafından Saratov vilâyetiniñ müstemlekesiniñ sert şaraitinde tutula. On eki kün evelsi, uydurılğan bir bozuv sebebinden ceza izolâtorına avuştırıldı, anda bulunğan müddeti boş aynıñ 25-nde bitti.
Boş aynıñ 27-nde Qırımtatar Maaliy Merkezi, siyasiy mabüsniñ ömür arqadaşı Olena Yakımenkoğa esaslanıp, bunı bildirdi.
"Tutuv şaraiti daa beter oldı. Sıq-sıq teşkerüvler, eyyet. Volodımır aman-aman iç bir şeysiz qaldı. Eski kitaplarını alıp kettiler, yañılarını ise bermeyler", — dep bildirdi Olena.
O, aqayınıñ ciddiy sağlıq meseleleri aqqında da ayta: "Sekiz yıllıq apis cezası öz izlerini kösterdi. Sağlıq meseleleri pek ciddiy. Mide hastalığı, tişlerniñ fena vaziyeti, baş ağrısı bar. Çıqarılğan köpürçik kemigi sıq qasevetlendire. Em de suvuqlanuv hastalıqlarını sıq çeke".
Volodımırnen bağ tutmaq imkânsız, çünki telefon lafları yasaq etile, ve müstemlekege mektüpler kelmey. Körüşüvler de cenk vaziyeti sebebinden telükelidir.
Olena Yakımenko bildirdi ki, advokatnı daimiy sürette almaq imkânı yoq, tek kritik vaziyetlerde ala bileler. Qadın Ukraina kontrolindeki topraqta bulunğanı içün, posılkalarnı aqayına bermek imkânı yoq.
QMMniñ qayd etkenine köre, işğalciler Volodımırnı Rusiye vatandaşlığını qabul etmege zorladılar, cenk vaqtında Herson vilâyeti endi "Rusiye" olğanını aytıp, pasportnı deñiştirmege talap ete ediler.
Hatırlatamız ki, Volodımır Yakımenko — Herson vilâyetiniñ sakini, "Avtomaydan" faalcisi, Donbasta ukrain ordusına ve 2014 senesi yarımadanı Rusiye işğali sebebinden terk etken qırımlılarğa yardım etken edi.
2017 senesi bozarğan aynın 11-nde ukrain sakini işğal etilgen Qırımnen memuriy sıñırdan keçkende Rusiye sıñırcıları tarafından tutuldı. Erkekni narkotik taşımasında qabaatladılar. Kremlniñ kontrol etkeni Qırım makemesi Yakımenkoğa müstemelekede on beş buçuq senege üküm etti.
Telegram, WhatsApp ve Facebookta Suspilne Qırım haberlerine abune oluñız
