Ankarada (Türkiye) Hacı Bayram Veli Universitetinde Rusiye basqıları, Ğolodomor, qırımtatar halqınıñ sürgünligi, işğal ve cenk mevzusında konferentsiya keçirildi. Mahsus musafirler Ukraina halq mebusları, Ukraina ve Türkiye arasında parlamentlerara dostluq gruppasınıñ vekilleri Mustafa Cemilev, Oleğ Sınütka, Mıkola Knâjıtskıy ve Ahtem Çiygöz oldılar.
Türkiyedeki Ukraina elçihanesiniñ matbuat hızmeti bunı bildirdi.
Qırımtatar halqınıñ lideri ve Ukraina halq mebusı Mustafa Cemilev çıqışta bulunıp, Rusiyeniñ ukrain ve qırımtatar halqlarına qarşı çoq asırlıq cinayetlerini qayd etti. O, Ğolodomor, sürgünlik ve Qırımnıñ devam etken işğali facialarına diqqat çekti. Cemilev qayd etti ki, Rusiye Federatsiyasınıñ Ukrainağa qarşı cenki — Rusiyeniñ müstemleke siyasetiniñ devamıdır.
"Qırımtatarlarnıñ lideri qayd etti ki, bu cenk yalıñız silâlı çatışma degil, Ukraina devletçiligi ve medeniy kimliginiñ yoq etilmesine doğrultılğan imperatorlıq tecavuzınıñ bir qısmıdır. O, barışıqnıñ tek Ukraina topraq bütünliginiñ, şu cümleden Qırımnıñ, bütünley ğayrıdan tiklenmesinen mümkün olğanını qayd etti ve Ukraina prezidenti Volodımır Zelenskıynıñ Barışıq formulasınıñ müimligini tasdıqladı", — dep bildirildi.
İlimler doktorı, Karabüyük universitetiniñ ocası Yuliya Biletska Rusiyeniñ Ukrainağa qarşı sistematik repressiyaları, hususan kollektivleştirüv, Ğolodomor ve Stalin repressiyaları aqqında tarif etti.
Kapadokya universitetiniñ ocası Valeriy Morkva, Rusiye istilâsınıñ demografik, iqtisadiy ve siyasiy aqibetlerini aydınlattı. Onıñ aytqanına köre, Rusiye ukrain kimligini yoq etmege, medeniyetini, tiliniñ, tarihını yoq etmege ve em Qırımda, em de Ukrainanıñ işğal etilgen topraqlarında öz qanunlarını kirsetmege sistematik şekilde tırışa.
Ankara içtimaiy ilimler universitetiniñ ocası F. Tutku Aydın, bölgede barışıq ve adaletniñ tiklenmesinde diplomatik, iqtisadiy ve uquqiy mehanizmlerniñ rolüni qayd etti.
Telegram, WhatsApp ve Facebookta Suspilne Qırım haberlerine abune oluñız
