İşğalciler tarafından Ukraina göñülli batalyonını maliye etkeni içün qanunsız olaraq yedi senege üküm etilgen Appaz Kurtamet Nijniy Novğorodda buluna. Anda o, Rusiye müstemlekesine etapını bekley. Ailesi, ne yerge etap etilecegini bilmey.
Siyasiy mabüsniñ anası Ayşe Kurtamet Suspilne Qırımğa bergen izaatında bunı bildirdi.
"Men tek onıñ (müstemlekeden — muar.) boş aynıñ 23-nde çıqqanını bilem. O, çıqıp, Nijniy Novğorodda bulunğanını ve eki afta devamında anda olacağını advokatqa bildirdi. İlerideki yol belli degil, soñ kitkeni yer, soñki noqtası da belli degil", — dep tarif etti Ayşe Kurtamet.
Appaznıñ qorantası eki aftadır onıñ bulunğanı yerni bilmey edi. Daa evel Kreml mabüsi "Vladimir merkezi" olaraq belli olğan Rusiye apishanesinde tutula edi.
Ayşe Kurtamet, işğal etilgen Qırımdaki SİZOda, telâş sebebinden peyda olğan, hronik teri hastalığı olğan oğlunıñ sağlıq vaziyeti aqqında qasevetini bildirdi. Anasınıñ qayd etkenine köre, uzun müddet devamında ve ilâclar olmasa, vaziyet daa beter ola bilir.
Appaz Kurtametniñ tutulması aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp ve Facebookta Suspilne Qırım haberlerine abune oluñız
