"Azlıq olğanlar, amma yeñilmegenler" — bu sözler qırımtatar ve yeudiy tillerinde Ukrainanıñ eñ kiçik tamır halqı olğan qırımçaqlarnıñ vekili, asker Petro Koşukovnıñ şevronını yaraştıra.
Petro Mahsus operatsiyalar quvetleri ve desant-ücüm ordularında cenkleşken edi, şimdi ise ordu islâatları ve çetelde Ukraina menfaatlarınıñ qoruvı üzerinde çalışa.
Suspilne Qırımğa bergeni intervyuda o, Qırım tamırları ve yarımadada keçken balalığı aqqında tarif etti.
Petro 2022 senesi çiçek ayında orduğa qoşuldı, kanadalı şirketnen añlaşmanı terk etti. Onıñ aytqanına köre, Rusiye istilâsı beklenilmegen bir şey degil.
"90-ıncı seneleri de, hususan Putin prezident olğan soñ, bizge ücüm eteceklerinden aman-aman emin edik. Nasıl olsa da, bu sadece vaqıt meselesi edi. Ukraina ve ukrainlerniñ barlığı ruslarnıñ tarihiy efsanesi tarafından red etile. Olar bunı qabul etip olamadılar", — dep tüşüne o.
Cenkten evel Koşukov media saasında çalışqan edi — çetel vatandaşları içün Qırımnıñ Rusiye işğali ve şarqta arbiy areketler aqqında film çıqardı. Vaziyetniñ müim vaqialarını kördi, hususan, 2014 senesi Slovyansknıñ azat etilüvini çekti. Şeerni azat etüv künü alıp ketken İhor Ğirkinniñ ştabından bir bardaq onıñ hatıralarından biri oldı.
"2014 senesi oraq ayınıñ 5-nde biz Ğirkinniñ merkezi olğan binanıñ içine kirdik. Mağazda daa dört filcan bar edi, men bellesem, qavenen. Ve er biri üzerinde şahsiy imza bar edi. Men birisini hatıra olaraq almaq yahşı bir fikir olğanını tüşündim. O vaqıttan berli, men ondan qave içip, olarnıñ energiyasını duşmannıñ qafasından içkenim kibi tüşünem", — dep hatırlay Petro.
Asker Qırım tamırını unutmay. O, Kıyivli, amma balalığını Qırımda qartanasınen keçirdi. Alâ daa onıñ dostlarınen oturışlarını hatırlay. Qadınlar qırımtatarca laf ete, qave içe ve karta oynay ediler.
"Olarnıñ arasında erkekler yoq edi. Bu ayrı qadınlar oturışlar edi. Ve, ne yazıq ki, bu ananelerni ve bilgilerni öz bala ve torunlarına bermediler. Men bellesem, sovet sisteması içün bu telükeli edi. Olar bunı kerekli saymadılar", — dep añlattı USQniñ askeri.
O, yarımada işğalden azat etilecek soñ, oğlunen beraber qırımçaq cemiyetini qurmağa arzu ete.
"O yerde cemaat toplansa, yahşı olur edi. Bu sözlerni menim büyük balam seslendirdi. Men şunı aytam: "Şunıñ içün yeudiy dinini qabul etmek kerek olğanını añlaysıñmı?". O, ise yunan katoligi olğanına baqmadan, "belli bir mesele yoq" dedi", — dep qoştı Petro.
Şimdi Petro Koşukov Ukraina Mudafaa nazirliginde çalışa, diplomatiyanen oğraşa. Onıñ şahsiy ikâyesi ve qırımçaq olıp doğması, ukrain nazar noqtasını Amerika senatorları ve kongressmenlerine bildirmege yardım ete.
Telegram, WhatsApp ve Facebookta Suspilne Qırım haberlerine abune oluñız
