Siyasiy mabüs Seyran Saliyevniñ qorantası baarden berli uzun müddetke körüşmege ruhset aldı. Qırımtatar Rusiye Federatsiyasınıñ Tula vilâyetindeki apishanede qanunsız apis cezasını çeke.
Körüşüv aqqında Kreml reinesiniñ ömür arqadaşı Mümine Saliyeva Facebook saifesinde video yayınlap bildirdi.
"Sıñırlanğan telefon açmalar, körüşüvler, yollamalar. Apis, ceza kibi körüne, amma kerçekten de er kes cezalana. Boşluq, manasız iş, yaqın insanlarnen bağ yoqlığı. Onı er bir qabaatından ğayıp ete", — dep yazdı Mümine Saliyeva video tasvirinde.
Hatırlatamız ki, Seyran Saliyev — vatandaş jurnalisti, faalci, 2017 senesi orta küz ayında Rusiye quvetçileri tarafından Bağçasarayda evinde keçirilgen tintüvden soñ qanunsız olaraq tutuldı. 2020 senesi qırımtatar adamı terrorizm ve "Hizb ut-Tahrir" siyasiy firqasında iştirak etkeninde qabaatlanıp, 16 yılğa maküm etildi. Adam Rusiye Federatsiyasınıñ Tula vilâyetindeki 4-nci apishanesinde qanunsız ceza çeke.
"Hizb ut-Tahrir davası"nıñ ekinci Bağçasaray gruppası aqqında ne bilemiz
2017 senesi orta küz ayınıñ 11-nde Rusiye FSB işğal etilgen Bağçasarayda altı qırımtatarnı tuttı: Timur İbragimov, Marlen (Süleyman) Asanov, Memet Belâlov, Seyran Saliyev, Server Zekiryayev ve Ernes Ametov.
Bir seneden soñ, 2018 senesi mayısnıñ 21-nde, işğalciler Edem Smailov ve Server Mustafayevni evlerinde tutıp aldılar.
Olarnı Rusiyede yasaqlanğan, amma Ukraina ve dünyanıñ ülkeleriniñ çoqusında serbest faaliyet köstergen Hizb ut-Tahrir islâm siyasiy firqasınıñ faaliyetinde qabaatlaylar.
Tutulğanlarnıñ episi işğalli Kıyiv rayon mhkemesiniñ qararındn apiske alındı ve tahminen üç sene taqiqat izolâtorında tutuldı.
2022 senesi berim ayınıñ 16-nda Rostov-na-Donudaki Cenübiy bölge arbiy makemesinde bu dava üzerinde üküm çıqarıldı. Onıñ qabaatlıları 13-19 sene apis cezasına maküm etildi.
022 senesi saban ayınıñ 14-nde Vlasiha şeerindeki Apellâtsiya arbiy makemesi imayeciniñ şikâyetlerini aman-aman bütünley red etti ve mabüslerniñ apis müddetlerini aman-aman deñiştirmedi. Seyran Saliyevniñ apis cezası bir senege qısqartıldı - 15 senelik müstemleke cezasına, Ernes Ametovnıñ apis cezası lâğu etildi.
Avropa parlamenti öz rezolütsiyasında Rusiye Federatsiyasını bütün ukrain siyasiy mabüslerini, şu cümleden "Hizb ut-Tahrir davası"nıñ ekinci Bağçasaray gruppasınıñ mabüslerini azat etmege çağırdı.
"Memorial" uquq qorçalayıcı merkezi olarnı siyasiy mabüsler olaraq tanıdı ve Rusiyeni olarnı acelen azat etmege çağırdı.
Telegram, WhatsApp ve Facebookta Suspilne Qırım haberlerine abune oluñız
