Qırımtatar Milliy Meclisi, Rusiyeniñ Ukrainağa qarşı açqanı cenkte "razılaşmalar" ve iç bir topraq teslimatı qabul etilmez, dep bildirdi. Böyleliknen Meclis, Ukraina Qırımnıñ işğaline razı olmaq kerek olğanını aytqan ğarbiy matbuat vastalarına cevap berdi.
Meclisniñ cevabı onıñ Facebook saifesinde yayınlandı.
O, Qırımtatar Milliy Meclisi Ukrainağa qarşı Rusiye istilâsınıñ tez vaqıtta yekünlenmesine ve topraq bütünliginiñ ğayrıdan tiklenilüvi esasında adaletli barışıqqa irişüvge samimiy istegeni bildirile.
"Qırımtatar Milliy Meclisi Ukraina Prezidenti, Ukraina Yuqarı Şurası, Ukraina havfsızlıq ve mudafaa quvetleriniñ Ukraina devlet suverenitetini ve topraq bütünligini qorçalamaq, yaşayışnı saqlamaq, havfsızlıqnı temin etmek, Ukraina vatandaşlarınıñ aqları ve serbestligini qorçalamaq maqsadınen yapılğan nazar noqtası ve areketlerini destekley. Rusiye Federatsiyasınıñ Qırımğa ve Ukrainanıñ başqa işğal etilgen topraqlarına er angi şekildeki topraq istilâsı tek beklenilgen barışıqqa ketirmez, aynı zamanda yañı arbiy ve siyasiy çatışmalarnıñ sebebi olur", — dep bildirildi.
Meclsi şunı da qoştı ki, Qırım tamır qırımtatar halqınıñ vatanı ve Ukraina devletiniñ ayırılmaz parçasıdır.
"Böylece, Qırım yarımadasınıñ topraq mensüpligi, onıñ uquqiy statusı, siyasiy, iqtisadiy, içtimaiy, medeniy ayatınıñ teşkil etilmesine dair iç bir qarar tamır qırımtatar halqınıñ iradesi ve Ukraina devletiniñ razılığı olmadan qabul etilmemeli ve olmaycaq", — dep Meclis qayd etti.
Telegram, WhatsApp ve Facebookta Suspilne Qırım haberlerine abune oluñız
