İşğal etilgen Qırımnıñ Aqmescit, Qarasuvbazar, Alupka şeerlerinde "Sarı şerit" areketiniñ faalcileri ukrain şiarlarınen timsallerni tarqattılar. Aktsiyanıñ iştirakçileri Ukrainağa qol tutqanlarını köstermek içün vatanperver yazılarınen levhalar, plakatlar ve banknotlarnı tarqattılar.
Areketniñ Telegram kanalında bu aqqında haber etildi.
Areketniñ bildirgenine köre, ukrain şiarlarınen timsaller şeer yerlerinde, Ay-Petri ve Aq Qayağa yollarda yerleştirildi.
"Qırımda narazılıq devam ete – ve faalcilerniñ sayısı er afta arta! İşğal yılları ukrainlerniñ küreş ruhunı bozmadı. Silâlı quvetlerge işanamız, Ukrainanı bekleymiz ve işğalden qurtaruvnı yaqınlaştıramız!", – dep qoştı areketniñ iştirakçileri.
Telegram, WhatsApp ve Facebookta Suspilne Qırım haberlerine abune oluñız
