Türkiyedeki Ankarada "Dobrudjide olğan: eki cian cenki arasında qırımtatarlarnıñ köçürmesi" adlı kitap taqdim etildi. O, adında qayd etilgen tarihiy devirde qırımtatar halqınıñ mecburiy migratsiyasına bağışlandı.
Boş aynıñ 2-nde Türkiye Qırımtatarlarnıñ medeniyet ve birdemlik vaqfı — Qırımtatarlarnıñ diaspora teşkilâtı bu aqqında haber etti.
Türkiyedeki Ukraina elçisi Vasıl Bodnar bildirdi ki, kitapta bütün dünyada yaşağan qırımtatar diasporasınıñ biñlernen ikâyesi tasvirlengen.
Onıñ aytqanına köre, eserde bugünki vaqialarnen tarihiy paralleller de bar.
"200 yıl evelsi ruslar Qırımğa kelgende de aynı şey edi, degilmi?... Aynı şey bugün de tekrarlandı, olar Ukrainağa cenk ve silânen keldiler. Bu tekrarlarnıñ sebebi, yazıq ki, yamanlıqnıñ tamırlarınıñ cezalandırılmamasıdır", — dep qayd etti diplomat.
Bodnar qayd etti ki, eki cian cenki arasında Romaniyada teşkil etilgen qırımtatar cemiyetleriniñ bir qısmı Türkiyede faaliyetini devam ettirdi. Anda şimdi eñ büyük qırımtatar cemiyetlerinden biri yaşay.
Boş aynıñ 5-nde "Ukrinform" bildirgeni kibi, Qırım vaqfınıñ yolbaşçısı Tunçer Kalkay kitapnıñ taqdim merasiminde aytqanı kibi, 1783 senesi Qırım hanlığı Rusiye tarafından zapt etilgen soñ, yüz yıldan çoq devam etken kütleviy köçüvler başlandı. O vaqıt qırımtatarlar Osmanlı İmperiyasınıñ çeşit bölgelerine tarqalğan ediler.
"Bütün qıyınlıqlarğa baqmadan, olar öz kimligi ve medeniyetini saqlap qaldılar", – dep qayd etti Kalkay.
Bundan da ğayrı, Bodnar Litvaniyada qırımtatarlarnıñ bu memlekette yaşağanları aqqında kitap derc etilecegini bildirdi.
Telegram, WhatsApp ve Facebookta Suspilne Qırım haberlerine abune oluñız
