Bu yılnıñ 9 ayı içinde Qırımda rus işğalcileri, eñ azından 99 arbiy talim keçirdiler. Bu sebepten, yerli sakinler patlamalarnıñ sesini daa sıq duyalar.
Bunı Qırımtatar Maaliy Merkezi (QMM) bildirdi.
"2024 senesiniñ 9 ayı devamında işğalciler Qırımda Rusiye ordusınıñ eñ az 99 talimini keçirdiler. İşğalciler yarımadada patlamalarnı arbiy talimlernen añlatmağa tırışalar", — dep bildirdi QMM.
Soñki üç ay içinde yarımadada Rusiye işğalcileriniñ 30dan çoq talimi keçirildi. Olarnıñ bir qısmı "diversiya gruppalarına qarşılıq kösterüv"ge bağışlanğan edi.
Hatırlatamız ki, berim ayınıñ 17-nde Rusiye işğalcileri "Bars-Qırım" "topraq mudafaası" bölükleri, Mudafaa nazirligi, Rosgvardiya ve Rusiye İçki işler nazirliginen beraberlikte Qırımda talimlerni keçirmege teşebbüs ettiler. İşğalciler şeerde blok noqtalarını qurdılar ve er bir maşinanı teşkereler.
Telegram, WhatsApp ve Facebookta Suspilne Qırım haberlerine abune oluñız
