İşğal etilgen Qırımnıñ Seyitler rayonında qaza neticesinde üç genç elâk oldı, daa bir kişi hastahanege alındı.
Bunı yarımadanıñ işğalli İçki işler nazirligi bildirdi.
Qayd etilgenine köre, qaza bir kün evelsi tahminen saat 23:00te Seyitler-Qarasuvbazar maşna yolunda yüz berdi.
İlk malümatlarğa köre, 28 yaşındaki "Şkoda Octavia" maşnasınıñ aydavcısı Büyük Eşkene köyü civarında areket etip, yol vaziyetini köz ögüne almadı ve telükesiz tezlikni saylamadı, neticesinde ögünde ketken eki pitbayk ve çağına yetmegenler tarafından idare etilgen kvadrotsikknen çatıştı.
"Yol qazası neticesinde eki çağına yetmegen pitbaykçı ve kvadrotsiklniñ yolcusı ölüm yarasını aldılar. Kvadrotsiklniñ aydavcısı, 2007 senesi doğğan adam, tibbiy müessisege alıp ketirildi", — dep bildirildi.
Qırımnıñ işğalli prokurorlığı qaza sebebinden teşkerüv keçirdi.
"Yol areketiniñ havfsızlığı qanunlarınıñ talaplarına riayet etüv, şu cümleden gençlerniñ naqliyat vastalarını idare etüvine qıymet kesilecek. Yol qazası adisesi boyunca teşkerüv Cumhuriyet prokurorlığınıñ nezareti altına alındı, cinaiy davanıñ açılması meselesi çezilmekte", — dep bildirdin işğalli müessise.
Telegram, WhatsApp ve Facebookta suspilne Qırım haberlerine abune oluñız
