2024 senesiniñ başından başlap mahsus işğalli hızmetler Qırımdaki "Yehova şaatları"nıñ evlerini eñ azından 15 kere tinttiler. Halqara tenqitke baqmadan, taqipler devam ete, "makemeler" de sert ükümler çıqarmağa devam ete.
QırımSOS talilcisi Yevheniy Yaroşenko bunı bildirdi. Soñki adiseler arasında 68 yaşındaki Tamara Bratsevağa qarşı arman ayında ve 53 yaşındaki Vitaliy Burıkağa qarşı orta küz ayında açılğan cinaiy davalar bar. Bratsevanı çıqmamağa yasaq etken ediler, Burıka ise ev apsine alındı, onı "ekstremist teşkilâtı"nıñ faaliyetini teşkil etkeninde qabaatladılar.
Yaroşenkonıñ aytqanına köre, 2024 senesi orta küz ayınıñ ortasına işğal etilgen Qırımnıñ "makemeleri" endi 13 din adamına üküm çıqardılar. Eñ sert ceza, pek çoq terbiye cezasından soñ müstemlekeden "Vladimir merkezi" apishanesine etap etilgen Viktor Staşevskıyğa berildi. Olardan 11-i altı yıldan altı buçuq yılğa qadar apis cezasını aldı.
Hatırlatamız ki, 2017 senesi Rusiye Yuqarı makemesi "Yehova şaatları" diniy teşkilâtını ekstremist olaraq tanıp, onıñ faaliyetini Rusiye Federatsiyasında ve işğal etilgen Qırımda yasaq etti. Buña baqmadan, "Yehova Şaatleri"niñ faaliyeti dünyanıñ çoqusı memleketinde qanuniy olaraq tanına.
"Yehova şaatları"nıñ malümatına köre, işğal etilgen Qırımda 31 din adamı cinaiy taqipke oğradı. Bu raqamğa azatlıqta bulunğan, amma cinaiy taqip sebebinden Qırımnı terk etmege mecbur olğan "Yehova şaatları" da kireler.
Hatırlatamız ki, "Din nezaret altında" adlı çoq serialı leyhasınıñ üçünci bölüminde Suspilne Qırım Rusiye işğal etken Qırımda "Yehova şaatları"nıñ taqip etilüviniñ sebebini ve nasıl etip yapılğanını añlata.
Telegram, WhatsApp ve Facebookta suspilne Qırım haberlerine abune oluñız
