Qırım Yuqarı makemesi Qırım adliye nazirliginiñ davasını qanaatlendirip, "Aluşta" mustaqil musulman cemiyetini yoq etmege qarar aldı. Cemaat, uquqçılarnıñ fikirince, siyasiy sebeplerden yapılğan bir sıra qabaatlavlar sebebinden akimiyet tarafından basqı altında buluna.
Advokat Rustem Kâmilev "Qırım birdemligi" cemaat teşkilâtına bunı añlattı.
Kâmilevniñ aytqanına köre, Qırım Adalet nazirligi, makemeniñ "Hizb ut-Tahrir"nen alâqası içün maküm etilgen sabıq yolbaşçısı Lenur Halilovnı ve başqa azalarını erkânından vaqtında çıqarmağanını iddia ete. Missionerlik faaliyetinen ve "ekstremist malümatnıñ tarqatıluvı"nen bağlı qabaatlavlar da bar.
"Bunıñ episi bu davağa esas oldı. "Aluşta" diniy cemiyetiniñ taqip etilmesi devam etse, bu Halqara din serbestligi insan aqlarınıñ şartnamesiniñ bozuluvı olur, dep bildirdik. Makemege bu meraqlı degil edi, ve bizden başqa añlatmalarnı soradılar", — dey Kâmilev.
O, Yuqarı makemeniñ qararınıñ sebepleri ne olğanını bilmey, çünki makemeci tek qarar qısmını oqudı, dep qayd etti.
"Elbette, şikâyet etmege devam etecekmiz. Avropa insan aqları makemesine ve BMniñ insan aqları eyyetine musulman diniy cemiyetini böyle sebeplerden taqip etkenleri aqqında dava açıldı — olarnıñ nazar noqtası içün intiqam", — dep qoştı Kâmilev.
Qırım Adalet nazirliginiñ "Alışta" mustaqil musulman cemiyetine qarşı açılğan davası aqqında bu sene arman ayınıñ soñunda belli oldı. 1990 senelerinden berli bar olğan cemaat resmen mustaqil olaraq qayd etildi.
2014 senesi Qırımnıñ işğalinden soñ, cemaat Rusiye qanunlarına köre ğayrıdan qayd etilmege mecbur oldı. O vaqıttan berli oña basqı yapıla, çünki o, Qırım musulmanları diniy idaresiniñ nezaretinde degildir.
Advokat Kâmilevniñ qayd etkenine köre, teşkilâtnıñ nizamnamesinde iç bir zıddiyet yoq ve onıñ qanuniyligi tasdıqlana, bunı 2016 senesi yañıdan qayd etilmesi köstere. Akimiyetniñ qayd etken cinayetleri "Aluşta" cemiyetiniñ yoq etilmesi içün yalıñız resmiy bir sebeptir.
Telegram, WhatsApp ve Facebookta Suspilne Qırım haberlerine abune oluñız
