İşğal etilgen Qırımda orta küz ayınıñ 21-nde mabüs Amethan Umerovnıñ 66 yaşındaki babası Ayder Umerov uzun sürgen hastalıqtan soñ vefat etti. Faalci apiske alınğan soñ bu ekinci ğayıbıdır. Eki afta evelsi Kreml mabüsiniñ qartbabası Ayder Kömurci vefat etti.
Bunı "Qırım birdemligi" cemaat birleşmesi Facebookta bildirdi.
Cenaze orta küz ayınıñ 22-nde saat 11:00de Bağçasarayda, Ostrovskıy soqağı, 62 adresi boyunca olacaq.
Birleşmeniñ malümatına köre, Rusiye apishanelerinde tutulğan qırım siyasiy mabüsleriniñ eñ azından 27 yaqın soy-sopu öz balalarını beklep olamadan vefat etti.
Qırımtatar uquq qorçalayıcısı Lütfiye Zudiyevanıñ Facebookta qayd etkenine köre, tuvğan ve yaqınlardan ayırılğanlarnıñ hastalıqları stress ve kederniñ sebebi ola. Hususan, apiske alınğan vatandaş jurnalisti İrına Danılovıçnıñ babası Bronislav Danılovıç, qızınıñ evi tintilgen ve o apiske alınğan soñ peyda olğan kanser hastalığıtan vefat etti.
Aynı vaqıtta siyasiy mabüs Vadım Bektemirovnıñ babası — Zayidin Bektemirov yürek hastalığından vefat etti, siyasiy mabüs Enver Ömerovnıñ anası — Zore Ömerova ise hronik hastalıqlardan vefat etti.
"Er kesni ana-babası ve balalarına qaytarmaq içün daa çoq ğayret köstermek kerekmiz. Qırım siyasiy mabüslerini qaytaruv meselesi çoq yıllıq beklev rejiminden çıqarılmalı", — dep qayd etti Zudiyeva.
Hatırlatamız ki, orta küz ayınıñ 7-nde Qırımda Hansaraynıñ sabıq restavratorı, siyasiy mabüs Amethan Umerovnıñ qartbabası, qırımtatar Ayder Kömurci vefat etti. O 86 yaşında edi. Adam ve qorantası, qırımtatar halqı sürgün etilgen soñ yarımadağa qaytqan ilk insanlardan biri edi.
Telegram, WhatsApp ve Facebookta Suspilne Qırım haberlerine abune oluñız
