ZMINA uquq qorçalayıcı merkezi 35 qırım memurını vatandaş ve siyasiy mabüslerniñ taqip etilmesinde qabaatladı. Cedvelge FSB hadimleri, prokurorlar, makemeciler ve Qırımdaki cezalandıruv müessiseleriniñ reberleri kirdiler. Uquq qorçalayıcılarnıñ fikirince, bu şahıslarğa qarşı areket serbestligini, maliye aktivlerine ve mülkiyetlerine kirişni sıñırlamaq içün halqara seviyede şahsiy sanktsiyalar kirsetilmeli.
Qırımdaki taqiplerge alâqası olğan memurlarnıñ cedveli Kıyivdeki matbuat konferentsiyasında taqdim etildi.
Uquq qorçalayıcılar, olarnıñ siyasiy sebeplerden taqip etilüvinde ve uydurılğan cinaiy davalarda iştirak etkenlerini tasdıqlağan deliller topladılar. ZMINA Merkeziniñ talilcisi Nargüzel Abibulayevanıñ añlatqanına köre, bu memurlarnıñ kimligini belgilev esnası pek çoq makeme esnasınıñ gizliligi sebebinden pek qıyın oldı.
"Rusiye akimiyeti, vatandaşlarnıñ taqip etilmesinde iştirak etken memurlar aqqında malümatnı cemiyetten gizlemege tırışa. Fotolar ya da tafsilâtlı malümat sıq-sıq makemeler qapalı olğanı sebebinden mevcut degil. Amma biz açıq ve qapalı menbalardan malümat toplamağa tırışamız. Şimdilik 260tan çoq memurnı qayd ettik, amma er kesni "qara cedvel"ge kirsetmek içün malümatımız daa yoq", — dep qayd etti Abibulayeva.
ZMINA Merkeziniñ leyhalar idarecisi Viktoriya Nesterenko añlattı ki, bu leyha Rusiye işğalli akimiyeti repressiyalarnıñ küçlü sistemasını qurğan Qırımda taqiplerni qayd etmek içün çoq yıllıq işniñ neticesi ola.
"Bu on sene devamında teşkilâtımız, başqa uquq qorçalayıcı teşkilâtlarnen beraber, insan aqları ve halqara gumanitar uquqnıñ bozuluvlarını qayd etti. Bütün bu cinayetler, duşmannen işbirlikçi olğan ya da yerli sakinlerge qarşı cinaiy davalarnı uydurmaq içün Rusiyeden Qırımğa avuştırılğan memurlar tarafından yapılğan edi", — dep Nesterenko tarif etti .
İşğalli akimiyetniñ cezasız qalmasına qarşı küreşniñ esas unsurlarından biri halqara adaletdir. Qırım Muhtar Cumhuriyeti ve Aqyar şeeri prokurorı Vitaliy Sekretarnıñ qayd etkenine köre, 2016 senesinden başlap onıñ idaresi Halqara cinaiy makemesinen cenk cinayetleri ve insanlıqqa qarşı cinayetlerniñ taqiqatında faal işbirlikte buluna.
"Biz Halqara cinaiy makemege Qırımda yapılğan cinayetler aqqında 13 malümat bildirüvini yolladıq. Uquq qorçalayıcılar tarafından qayd etilgen adlarnıñ bir qısmı da malümatlarımızda bar", — dep bildirdi Sekretar.
Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Olha Kurışko, aqiqatnı bilmek ve cinayetçilerni mesüliyetke çekmek aqqı olğan keçici adaletniñ müimligini qayd etti.
"Cinayetlerni muntazam sürette aydınlatmaq, hainlerni ve siyasiy taqiplerge alâqası olğanlarnı belgilemek kerekmiz. Bu şahıslarnıñ bazıları endi sanktsiyalar cedveline kirsetilgen. Halqara toplulıq ukrain ve halqara sanktsiyalarnı uyğunlaştırmaq içün çalışa, amma malümat toplav usulları ve sanktsiyalarnıñ qullanuv kriteriyleri farqlı ola bile", — dep qoştı Kurışko.
Uquq qorçalayıcılar halqara ortaqlarınen çalışıp, bu memurlarnı Avropa ve AQŞnıñ sanktsiya cedvellerine kirsetmege tırışalar. Bir sıra körüşüvler endi diplomatlarnen, şu cümleden BM ve OSCEnen keçirildi, anda qayd etilgen şahıslarnıñ siyasiy taqip ve arbiy cinayetlerde iştirak etkenine dair deliller taqdim etildi.
Ukraina prokurorlığı duşmannen işbirlikçilerni tutmaq içün çalışmağa devam ete. Uquq qorçalayıcılar çeşit cinayetler, hususan devlet hainligi ve arbiy cinayetler boyunca 600den çoq qabaatlav aktlarını qayd ettiler.
Telegram, WhatsApp ve Facebookta Suspilne Qırım haberlerine abune oluñız
