Ukraina havfsızlıq hızmeti ve Qırım Muhtar Cumhuriyeti ve Aqyar şeeriniñ prokurorlığı işğalcilerniñ tarafına keçken Qırımdan Ukraina İçki işler nazirliginiñ eki sabıq hadimine devlet hainligindeUkraina CQniñ 111. maddesiniñ 1. qısmı şübe bildirdiler. Olar 15 senege qadar apis cezasını ala bileler ve mal-mülkleri müsadere etile bile.
Orta küz ayınıñ 21-nde Telegramda muhtariyetniñ prokurorlığı bunı bildirdi.
Taqiqatnıñ malümatına köre, 2012-2013 seneleri olar Qırım Muhtar Cumhuriyetinde Ukraina İçki işler nazirliginiñ Baş idaresiniñ Qarasuvbazar rayonınıñ narkotik ile küreş sektorınıñ yolbaşçısı ve Qırım Muhtar Cumhuriyetinde Ukraina İçki işler nazirliginiñ Baş idaresiniñ Aluşta şeer bölüginiñ cemiyet havfsızlığı polisiniñ yolbaşçısınıñ muavini olıp çalışqan ediler.
Qırım işğal etilgen soñ şübeliler Ukraina halqına sadıqlıq antını bozıp, Rusiyege hızmetke keçtiler.
Birincisi 2014 senesi "Rusiye İçki işler nazirliginiñ Qarasuvbazar rayon bölüginiñ operativ iş boyunca politsiya yolbaşçısınıñ muavini" olaraq çalışıp başladı, 2023 senesinden ise qanunsız şekilde "Rusiye İçki işler nazirliginiñ Nijnegorsk rayon bölüginiñ yolbaşçısı" vazifesini becere.
Ekinci şübeli 2014-2023 seneleri devamında "Rusiye İçki işler nazirliginiñ Aluşta şeerindeki bölüginiñ yolbaşçısı" ve "Rusiye İçki işler nazirliginiñ Yalta şeerinde cemaat tertibini qorçalav boyunca polits yolbaşçısınıñ muavini" edi.
"Şübeliler öz areketlerinen yarımadada içki işlerniñ işğalli organlarınıñ meydanğa ketirilmesine ve çalışmasına yardım ettiler, em de istilâcı devletniñ vekillerine Ukrainağa qarşı bozuv faaliyetini alıp barmağa yardım ettiler", — dep müessise qayd etti.
Aynı zamanda UHHniñ matbuat hızmeti Facebookta qayd etti ki, ekisi de Ukraina nezaretinde olmağan topraqta bulunğanı içün olarnı mesüliyetke çekmek içün kompleks tedbirler alıp barıla.
Telegram, WhatsApp ve Facebookta Suspilne Qırım haberlerine abune oluñız
