Ukraina tarihınıñ milliy müzeyiniñ hazinesinde qırımtatar medeniyetiniñ zengin mirasını aydınlatqan "MİRAS. THE HERITAGE" kitabı taqdim etildi.
Ukraina medeniyet ve strategik kommunikatsiyalar nazirligi bu aqqında yazdı.
Neşir oquyıcılarğa qırımtatar halqınıñ tarihı, ananeleri ve sanatına kirmek içün unikal imkân bere. Kitap saifelerinde Ukraina tarihınıñ milliy müzeyiniñ fondlarından ve şahsiy kollektsiyalardan toplanğan quyum şeyleri, ananeviy urba, nağış ve başqa artefaktlar taqdim etildi.
"MİRAS. THE HERITAGE — bu sadece bir kitap degil, bu medeniy hatıralarnıñ saqlanmasıdır. Rusiye istilâsı vaqtında, Qırımnıñ mirası telüke astında olğanda, böyle bir neşriyat medeniy çeşitlik ve tamır halqlarınıñ aqları oğrunda küreşniñ müimligini hatırlata", — dedi Avropa integratsiyası meseleleri naziriniñ muavini Taras Şevçenko.
Kitap ukrain, qırımtatar ve ingliz kibi üç tilde azırlandı, bu ise onı keniş auditoriya içün irişile. Neşir ukrain ve qırımtatar araştırmacıları, ressamları ve cemaat erbaplarınıñ umumiy işiniñ neticesi oldı.
"Medeniy miras — bu bizim kimligimiz, hatıralarımızdır. Qırımtatarlarnıñ asırlar devamında şekillengen zengin ve eski tarihı bar. Bularnıñ episi yañı neşirde qayd etildi", — dedi "Ukraina tarihınıñ milliy müzeyiniñ hazinesiniñ" müdiri Nataliya Pançenko.
Telegram, WhatsApp ve Facebookta Suspilne Qırım haberlerine abune oluñız
