7 senege maküm etilgen siyasiy mabüs Appaz Kurtametniñ anası BMTnıñ temsilcilerine muracaat etip, oğlunı Rusiye apishanesinden azat etmege çağırdı.
BMTnıñ 57-nci insan aqları şurasınıñ çerçivesinde keçirilgen "Açıq ava tübünde apishanede on sene: işğal etilgen Qırımda insan aqları" adlı yan tedbirde Ayşe Kurtametniñ BMT memleketleriniñ temsilcilerine video muracaatını Meclisniñ reisiniñ birinci muavini, sabıq mabüs Nariman Celâl yayınladı.
"Yüregimniñ derinligindeki acınen oğlumnıñ taqdiri aqqında aytmaq içün sizge muracaat etem. Oğlum Kurtamet Appaz, 22 yaşında, Ukrainanıñ işğal etilgen topraqlarında adaletsiz areketlerniñ qurbanı oldı. Oğlumnı Rusiye quvetçileri, cenk başlağanından berli işğal etilgen Herson vilâyetiniñ FSB hızmetleri hırsızladılar ve Qırımğa alıp kettiler", — dep tarif etti qırımtatarnıñ anası.
Onıñ hatırlatqanına köre, Kurtametni Rusiye FSBnen işbirlik yapması içün zorlap alıp ketkenler. Onıñ taqdiri aqqında qadın bir qaç ay devamında bilmey edi. İşğalciler, Ukrainanı qorçalağan dostlarına para yollağanı içün 7 sene sert rejimli müstemlekege üküm ettiler.
"FSBnen işbirlik yapmaqtan vazgeçkeni içün, onı "terrorizmge para berüv"de qabaatladılar, biz ise bunı iç bir vaqıt qabul etmeymiz. Halqara toplulıqtan, Birleşken Milletlerden oğlumnı qurtarmaq içün küreşke yardım etmelerini rica etem, onıñ sesi olmağa, aqiqatnıñ sesi olmağa çağıram. Sessizlik, cezasızlıq ve areketsizlik tek yaramaylıqnı quvetleştire", — dep qayd etti eñ genç siyasiy mabüsniñ anası.
Şimdi Appaz Kurtamet "Vladimir merkezi" adlı Rusiye apishanesinde buluna.
"Lütfen, onı deñiştirmege yardım etiñiz, bu bir yardım çağıruvıdır, oğlum ve babası azatlıqta olmalı. Oğlum kibi namuslı ve temiz adamlarğa apishanede yer yoq. Sizden onı qurtaruvda iştirak etmenizi rica etem", — dep muracaat etti Ayşe Odabaş.
Hatırlatamız ki, 2023 senesi çiçek ayınıñ 20-nde Aqmescitniñ Kıyiv rayon makemesi Appaz Kurtametni 7 sene sert rejimli müstemlekege üküm etti.
Appaz Kurtametniñ tutulması aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp ve Facebookta Suspilne Qırım haberlerine abune oluñız
