"Hizb ut-Tahrir davası"nıñ ekinci Bağçasaray gruppasınıñ mabüsi Server Zekiryayev Rusiyeniñ Tula vilâyetindeki 1. apishanesinde azap çekmege devam ete.
Siyasiy mabüsniñ ömür arqadaşı Zarema Zekiryayeva Facebookta bunı bildirdi.
Onıñ qayd etkenine köre, bu sene arman ayından başlap, Zekiryayevniñ tutuv şaraiti aqqında bir qaç kere haber etilgen edi. Onıñ aytqanına köre, aş ve idmanlardan soñ Server qusa, boğazında devamlı acı bir tat duyula, başı aylana. Sağlığı fenalaştı, zehirlenmesi ise daa beter ola. Bundan da ğayrı, siyasiy mabüs kanalizatsiya borusından çıqqan avalarnı nefes almağa mecbur.
Qadın müstemlekeniñ memuriyetine ve Rusiye prokurorlığına muracaat etti, amma kameralardaki şarait "tutuluv içün maqbul" olğanı aqqında cevap aldı.
Onı kamera tipli odağa ketirmege da bir qaç kere red etilgen edi. Müstemlekeniñ hadimleri Serverni anda "yaşayış tarzı içün" yollağanlarını bildireler ve onı "terrorist" olaraq adlaylar.
"Rusiye Federatsiyasınıñ Taqiqat eyyetiniñ Tula vilâyetindeki Taqiqat idaresine aqayımnıñ tutuv şaraitini teşkermek talabınen mektüp yolladım. Cevap olaraq vesiqa aldım, anda Tula vilâyetiniñ Donsk şeerinde taqiqat bölüginiñ yolbaşçısı vazifelerini eda etken adamğa muracaatnı baqmağa avale etti, "Rusiyeniñ Tula vilâyetinde Federal Cezalandıruv hızmetiniñ VK-1 Federal kazna müessisesiniñ hadimleri tarafından Zekiryayev Serverge nisbeten yapılğan qanunsız areketler sebebinden", — dep bildirildi.
Bundan ğayrı, o, cemaatnı ve dünya toplulığını Server ve bütün siyasiy mabüslerni qorumağa çağırdı ve olarnıñ acele azat etilmesini talap etti.
"Hizb ut-Tahrir davası"nıñ ekinci Bağçasaray gruppası aqqında ne bilemiz
2017 senesi orta küz ayınıñ 11-nde Rusiye FSB işğal etilgen Bağçasarayda altı qırımtatarnı tuttı: Timur İbragimov, Marlen (Süleyman) Asanov, Memet Belâlov, Seyran Saliyev, Server Zekiryayev ve Ernes Ametov.
Bir seneden soñ, 2018 senesi mayısnıñ 21-nde, işğalciler Edem Smailov ve Server Mustafayevni evlerinde tutıp aldılar.
Olarnı Rusiyede yasaqlanğan, amma Ukraina ve dünyanıñ ülkeleriniñ çoqusında serbest faaliyet köstergen Hizb ut-Tahrir islâm siyasiy firqasınıñ faaliyetinde qabaatlaylar.
Tutulğanlarnıñ episi işğalli Kıyiv rayon mhkemesiniñ qararındn apiske alındı ve tahminen üç sene taqiqat izolâtorında tutuldı.
2022 senesi berim ayınıñ 16-nda Rostov-na-Donudaki Cenübiy bölge arbiy makemesinde bu dava üzerinde üküm çıqarıldı. Onıñ qabaatlıları 13-19 sene apis cezasına maküm etildi.
022 senesi saban ayınıñ 14-nde Vlasiha şeerindeki Apellâtsiya arbiy makemesi imayeciniñ şikâyetlerini aman-aman bütünley red etti ve mabüslerniñ apis müddetlerini aman-aman deñiştirmedi. Seyran Saliyevniñ apis cezası bir senege qısqartıldı - 15 senelik müstemleke cezasına, Ernes Ametovnıñ apis cezası lâğu etildi.
Avropa parlamenti öz rezolütsiyasında Rusiye Federatsiyasını bütün ukrain siyasiy mabüslerini, şu cümleden "Hizb ut-Tahrir davası"nıñ ekinci Bağçasaray gruppasınıñ mabüslerini azat etmege çağırdı.
"Memorial" uquq qorçalayıcı merkezi olarnı siyasiy mabüsler olaraq tanıdı ve Rusiyeni olarnı acelen azat etmege çağırdı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
