İşğal etilgen Qırımdan Rusiye diniy serbestlik aqqını sıñırlav siyaseti sebebinden pek çoq din cemiyeti çıqarıldı.
"QırımSOS"nıñ temsilcisi Sabina İlyas OSCE Varşava insan ölçüsi meseleleri konferentsiyasınıñ açılışında çıqışta bulunıp bunı bildirdi, dep Qırım.Aqiqat yazdı.
Onıñ qayd etkenine köre, soñki vaqıtları Ukrain pravoslav kilsesiniñ faaliyeti bastırıldı, "Aluşta" ve "Eski Qırım" musulman cemiyetleriniñ taqip etilüvi qayd etildi, em de "Yegova şaatları"nıñ tarafdarlarınıñ evleri tintildi. Bunıñ ile uquq qorçalayıcı qayd etti ki, Moskva patriarhatınıñ Ukraina pravoslav kilsesini taqip etüv adiseleri yoq.
"Hristian ve musulman dinlerinen bağlı olaraq, taqip etüvlerni qavmiy sebeplerden ayırmaq mümkün. Rusiye qanunlarınen oynap, Qırım sakinleri, ukrainler ve qırımtatarlarğa terrorist ve aşırıcılıq yarlığını asıp, suniy telüke ve duşmanlarnı yarattı, milletlerarası kerginlik ve qorqu müitini yarttı", - dep İlyas qoştı.
Hatırlatamız ki, Suspilne Qırım "Din nezareti altında" çoq seriyalı yayınlarnı başlattı. Birinci sanında, Qırımda mustaqil musulman cemiyetleriniñ barlığı ruslarnı raatsızlay, şunıñ içün olarğa basqı ve taqip etile, dep aytıldı.
Telegram, WhatsApp ve Facebookta Suspilne Qırım haberlerine abune oluñız
