Aqmescitteki Rusiye SİZOnıñ tibbiy bölüginiñ hadimleri "Hizb ut-Tahrir" dörtünci Bağçasaray gruppasınıñ kör mabüs Oleksandr Sizikovnıñ vesiqalarını qabul etmege red ettiler.
"Qırım birdemligine" Qırım sakininiñ anası Olena bunı bildirdi.
Onıñ aytqanına köre, oğlunıñ bütün hastalıqları aqqında vesiqalar, sanki eski tarihlar sebebinden qabul etilmedi. Tibbiy bölükte Sizikovnıñ tibbiy teşkerüvini özleri keçireceklerini bildirdiler.
Siyasiy mabüsniñ anası hatırlattı ki, 2009 senesi yol qazası neticesinde oğlu bütünley kör oldı, ve daa bir qaza neticesinde onıñ süyek qanı kesildi. Sizikovnıñ daa bir hronik aşqazan hastalığı bar, onıñ içün muntazam sürette masaj ve mütehassıslarnıñ nezareti kerek.
Berim ayınıñ 14-nde aqşam Sizikovnı evden alıp vaqtınca izolâtorğa kettiler ve eşyalarını toplamağa bermey, Bağçasarayğa alıp kettiler, dep tarif etti anası. Sentâbrniñ 19-na keçer gecesi onı Aqmescitniñ 1. SİZOğa avuştırğanlar. Bir qaç künden soñ qadın oğlunı kördi.
"Men kirgenimde (qısqa müddetli körüşüvler odasına — muar.) Saşko yanımda oturğan edi, çette. Yani, o, (menim - muar.) ne olğanını bile bilmey edi", — dep tarif etti o.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
