"Qırım" ("Къырым") qırımtatar gazetası yarım yıl devrinde üçünci kere Qırımnıñ işğalci akimiyeti tarafından tarihiy materiallarnı çetel agentleri olaraq qayd etmeden derc etkeni içün memuriy ceza telükesi altında buluna.
Bunı "Qırım esnası" teşkilâtı Aqmescit rayon makemesiniñ resmiy saytına esaslanıp bildirdi.
Uquq qorçalayıcılar, makeme celpnamesiniñ sebebi, 1970-inci yıllarınıñ soñunda "Radio Svoboda" ve "Amerika Sesi"nen işbirlik yapqan sovet dissidenti Lüdmila Alekseyevanıñ ayatı aqqında malümatnıñ derc etilmesi oldı, dep qoşalar. Qırımnıñ işğalci akimiyeti, gazetanıñ bu kütleviy haber vastalarını Rusiye qanunlarına köre "çetel agentleri" olaraq tanığanını kösterecek, dep bekley edi. Makeme oturışı orta küz ayınıñ 16-na tayin etildi.
Halqara gumanitar uquqına binaen, işğalci devletlerniñ işğal etilgen topraqlarda öz qanunlarını qullanmaq aqqı yoq. "Qırım esnası" qayd etti ki, işğalci akimiyetniñ Rusiye qanunlarını körmemezlikke urğanı içün yerli kütleviy haber vastalarını mesüliyetke çekmek ıntıluvı, halqara seviyede makemeden evel taqiqat içün esas ola bilecek vatandaşlarnıñ aqlarını boza.
Telegram, WhatsApp ve Facebookta Suspilne Qırım haberlerine abune oluñız
