İşğal etilgen Aqmescitte, işğalli memuriyet tarafından teşkil etilgen "Rusiye patriotizmi ve milletlerarası birliginiñ saqlanuvında musulman qadınıñ rolü: ananeler ve zemaneviylik" adlı birinci bütünrusiye qadınlar qurultayı olıp keçti.
Ukraina prezidentiniñ Qırım Muhtar Cumhuriyetindeki temsilciligi bunı bildirdi.
Temsilcilikniñ malümatına köre, böyle vaqialar işğalcilerniñ diniy ve medeniy institutlar vastasınen öz rejimini qanuniyleştirmek ıntıluvıdır. İşğalli memuriyetniñ vekilleriniñ "diniy qıymetler boyunca vatanperverlik terbiyesi" aqqında aytqanları, Qırım musulmanlarına Rusiye Federatsiyasınıñ istilâcı siyasetini aqlağan bir mefküre qoymaq ıntıluvlarını qayd ete.
Temsilcilikniñ qayd etkenine köre, bu kibi tedbirler teşviqat aletidir ve halqara uquq ceetinden onıñ iç bir qanunligi yoq. Olar işğalli rejimni pekitmek maqsadınen yapılğan ve Rusiyeniñ vaqtınca işğal etilgen topraqlarda diniy cemiyetlerni boysundırmaq strategiyasınıñ bir qısmıdır.
Orta küz ayınıñ 1-nden başlap Suspilne Qırım işğal etilgen yarımadada diniy cemiyetlerniñ taqip etilüvi aqqında bir sıra malümat taqdim etecek. Rusiyeniñ Qırımdaki diniy cemiyetlerge nisbeten siyaseti, nezaret etilmegenlerni yoq etmekten ibaret. Bu nasıl olğanını Suspilne Qırımdaki "Nezaret altında din" programmasından ögreniñiz.
Telegram ve Facebookta Suspilne Qırım haberlerine abune oluñız
