Ukraina Nazirler Kabineti 2024-2027 seneleri devrinde işğalden azat etilecek topraqlarda tasil sistemasını ğayrıdan tiklev tedbirleriniñ planını tasdıqladı. Esas vazifelerden biri — Rusiye teşviqatınıñ tesirine oğrağan gençlerniñ reintegratsiyası ve olarnıñ ukrain medeniy-maarif alanına qaytmasıdır.
Vesiqanıñ azırlanmasına qoşulğan Ukraina Prezidentiniñ Qırım Muhtar Cumhuriyetindeki Temsilciligi bunı bildirdi.
Ukraina Prezidentiniñ Qırım Muhtar Cumhuriyetindeki Temsilciligi qayd ete ki, tasil müessiseleri içün hadimler yedegini teşkil etmege diqqat ayırılacaq, çünki 2014 senesi işğalden evel Qırımda 22 biñden çoq oca ve aman-aman 7700 mektepten evel tasil hadimi çalışqan edi. Olarnı celp etüv ve azat etilecek topraqlarda çalışmağa azırlav, tasil ceryanlarınıñ ğayrıdan tiklenmesinde müim bir basamaq olacaq.
Tasilni ğayrıdan tiklev planı aşağıdaki tedbirlerni qaplap ala:
- Tasil ceryanınıñ iştirakçilerine rus tiliniñ uzun sürgen tesirinden soñ ukrain sistemasına alışacaqlarında destek. Bu, hususan tarih, edebiyat ve başqa gumanitar fenlerniñ ögretüvinde rus standartlarından ukrain standartlarına keçüvni közde tuta.
- İşğalden azat etilecek topraqlarda çalışacaq ocalarnıñ ihtisasını yükseltmek. Hususan, yañı ihtisaslar içün imkânlar yaratmaq.
- Qırımtatar tili kibi Ukrainanıñ tamır halqlarınıñ tillerinde oquv programmaları ve dersliklernen beraber oquv materiallarınıñ azırlanması. Bir müim qısmı, aliy oquv yurtlarında tamır halqlarnıñ tarihı ve medeniyetini ögrenüv merkezleriniñ açılması olacaq.
- Qırımtatar tili ve edebiyatınıñ inkişafı. Plan, azat etilecek topraqlarda milliy menliginiñ ğayrıdan tiklenilmesinde müim bir element olğan qırımtatar halqınıñ medeniy mirasını saqlav ve inkişaf ettirüv tedbirlerini közde tuta.
- Rusiye tecavuzından zarar körgen bala ve gençlerniñ içtimaiy-ruhiy reabilitatsiyası. Mahsus programmalar olarğa oquv ceryanına qoşulmağa ve kerekli destekni almağa yardım etecek.
- Vaqtınca işğal etilgen topraqlarda tasil alğanlarnıñ tasiliniñ qıymetlendirilmesi ve tanınması tertipke ketirilecek, böyleliknen gençler Ukraina toprağında çalışmalarını ya da tasil almalarını devam ete bileler.
Telegram ve Facebookta Suspilne Qırım haberlerine abune oluñız
