Vatandaş jurnalisti ve faalci Remzi Bekirovnı aman-aman bir aydan çoq vaqıt Hakasiya Cumhuriyetiniñ Abakan şeerinde 33. TMTüzetüv müstemlekesiniñ ŞİZOCeza izolâtorısında tutıp turalar. İşğalciler 19 yıl apis cezasına üküm etilgen siyasiy mabüsni lagerge yibermeyler.
"Qırım birdemligi"ne onıñ apayı Halide Bekirova bunı bildirdi.
Qayd etilgenine köre, o, müstemlekege armannıñ 12-de kelgeninen Bekirov karantinge alındı. Amma karantin kamerasındaki müddetini eda etip olamadı - siyasiy mabüs, soqaqqa çıqqanında baş kiyimini kiymegeninden sebep beş künge ŞİZOğa yollanıldı.
İzolâtordan çıqmağan soñ, müstemlekeniñ hadimine ögretüv malümatını bildirmegeni içün daa bir müddetke ceza aldı. Bekirovnıñ izolâtorda bulunuv müddeti daa beş künge uzatıldı.
Bundan soñ, qırım siyasiy mabüsi tam kündüz karantin kamerasına qaytıp oldı, amma müstemlekeniñ hadiminen selâmlaşmağanı ve öz malümatını aytmağanı içün oña qarşı protokol tizildi. Neticede Remzi Bekirovnı daa sekiz künge ŞİZOğa yerleştirdiler.
Bir qaç künden soñ, siyasiy mabüsni umumiy bölükte tutıp aldılar, amma berimniñ 6-nda o, kün tertibini bozğanı içün 10 künlik ceza aldı. Halide Bekirovanıñ aytqanına köre, gece "yataqtan qalqıp, namaz qılğanı içün".
Altıncı kere faalcini ŞİZOğa yibermegenler, amma oña kene müstemlekeniñ hadimine malümat bermegeni içün maruza yazılğan edi.
"O, bu müstemlekede bulunğan ilk qırım siyasiy mabüsidir. Onı diqqatnen nezaret eteler, maneviy basqı yapalar. Amma bütün bu aşırı sözler onı ŞİZOğa kirsetmek içün sebep degil. Oña mektüp yazmağa, telefon etmege imkân bermeyler, onıñ içün ondan haber alamaymız", - dep bildirdi Halide Bekirova.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
Telegram ve Facebookta Suspilne Qırım haberlerine abune oluñız
