Qırımda Rusiye işğalcileri eki adamnı 20 ve 6 yıl apis cezasına maküm ettiler. "Terroristik areket" yapmağa tırışqanlarını ve "casuslıq" yapqanlarını bildirdiler.
RIA "Novosti Qırım" Telegram-kanalında bu aqqında haber berdiler.
"Qırımda terrakt azırlağan ukrain agenti 20 sene sert rejimli müstemlekede qalmağa üküm etildi. Patlayıcı aletniñ parçalarını satın almağa yardım etken ortağı 6 senege üküm etildi", — dep bildirildi.
Aynı vaqıtta Rusiyeniñ "TArS" agentligi Telegram kanalında, Qırımda Federal havfsızlıq hızmetiniñ hadiminiñ maşinasını patlatmağa tırışqan eki rusiyeli aqqında aytılğanını yazdı.
Bundan da ğayrı, adamlar demiryol astyapısı ve işğalcilerniñ areketleri aqqında malümat toplay ediler. Olar bunı "Ukraina mahsus hızmetleri"niñ vazifesi olaraq yaptılar.
Uquq qorçalayıcılar Qırımda "agentler"niñ tutulması aqqında ne aytalar
Qırımda azatlıqtan marum etilgen siyasiy mabüsler arasında casuslıq, diversiya ve terrorizmde qabaatlanğan pek çoq insan bar. Uquq qorçalayıcılar bu davalarnı "ukrain diversantları" dep adlandıralar.
"Bu insanlar arasında casuslıqta qabaatlanğanlar bar, soñra ise, işkencege oğratıp, qabaatını tanımağa mecbur eteler, özüni qabaatlaylar. Bazıları razı olalar, çünki eger olar özlerini vatandaşlar degil de, FSU ya da UHH, Bİİ ve ilâhre olaraq tanısalar, olarnı tezce deñişirler, dep rusiyeliler alçaqlıqnen vade eteler. Tabiiy ki, bunıñ episi yalandır. Olar bunı statistika yapmaq ve haber boşluğında Rusiye Qırımdaki ukrain diversantlarınen muvafaqiyetnen küreşkenini köstermek içün yapalar", — dep uquq qorçalayıcı İrına Sedova Suspilne Qırımğa añlattı.
Hatırlatamız ki, Rusiye FSB vaqtınca işğal etilgen Aqyarda "diversiya" azırlağan 51 yaşındaki yerli sakinni tuttı, dep bildirdi.
Telegram, Viber ve Facebookta Suspilne Qırım haberlerine abune oluñız
