İşğalciler qanunsız Keriç köprüniñ mudafaa sistemasını yañı qoruv qurulışlarına ve zemaneviy ava ve dronğa qarşı mudafaa vastalarına esaslanıp quvetleştirmege devam eteler.
Jurnalist taqiqatları merkeziniñ (JTM) malümatında bu aqqında aytıla.
Jurnalistlerniñ malümatına köre, berim ayınıñ başından berli yedi köpürniñ quruluvı aqqında haber peyda oldı. Olar köpürniñ beton tiremelerini deñiz dronlarınıñ ücümlerinden qorumaq kerekler. Bu qurulışlarnıñ uzunlığı 500×600 metrge yete.
Merkezniñ malümatına köre, ruslar pirslerden ğayrı, otuz barjadan ibaret olğan qoruv sızığını ve suv üzerindeki bon qorunmalarını qullanalar. Deñizde köpürge parallel olaraq, qoruvnı daa da quvetleştirgen, beton tetrapodlar ve tanklarğa qarşı "yıqıcılarğa" oşağan metall qurulışlar qoyulğan.
Jurnalistler, Tuzla adasınıñ cenübiy tarafında Rusiye ava mudafaası sistemalarınıñ yerleştirilüvi, hususan köpür altında ve yalıda körüngen "Pantsır-S1" ZRKnıñ yerleştirilüvi tapılğanını qoşalar. Bundan da ğayrı, bu rayonda bir qaç başqa deñiştirilgen sistema, şu cümleden "Pantsır-S1M" yerleşe.
Bundan da ğayrı, JTMniñ yazğanına köre, ruslar bir qaç közetüv noqtası, silâ noqtaları ve ağlarnen gizlengen Ava mudafaası noqtalarını qurdılar. Köpürni çeşit sınıflı arbiy kater qoruy, hususan işğal etilgen Keriç limanında FSBniñ 8-12 yalı qoruvı gemisi buluna.
Hatırlatamız ki, Ukraina Arbiy-deñiz quvetleriniñ nutuqçısı Dmıtro Pletençuk keçenlerde qanunsız qurulğan Qırım köprüni Rusiye işğalcileri ava mudafaasınıñ bütün mevcut ava mudafaası sistemalarınen qoruy, dep bildirdi. Hususan, qurulışnı "S-500", "S-400", "S-300" ve "Pantsır-S1" ava sistemalarınen qorçalamaq aqqında söz yürsetile
Telegram ve Facebookta Suspilne Qırım haberlerine abune oluñız
