Herson vilâyetiniñ Novooleksiyivka qasabasında tutulğan qırımtatar Akim Ğafarovnı Aqmescitniñ 2-nci SİZOdan belli olmağan yerge alıp kettiler. Faalci 2022 senesi mayıs ayında Herson vilâyetiniñ bir qısmı işğal etilgen soñ FSB hadimleri tarafından hırsızlandı ve soñra Qırımğa alıp ketirildi.
"Tribunal. Qırım epizodı" uquq qorçalayıcı teşebbüsiniñ menbası bu aqqında haber berdi.
Ğafarov 56 yaşında. İşğalciler 2022 senesi bozağan ayda faalci Noman Çelebicihan adlı batalyonda iştirak etkeninde qabaatladı. 2024 senesiniñ başında işğalli Aqmescitniñ Kıyiv rayon makemesi davanı baqmağa başladı.
Ğafarov qabaatını tanımadı, amma makeme, qırımtatar göñülli batalyonınıñ nişanlarınen kamuflâjlı urba kiyip tasvirlengen fotoresimni delil olaraq aldı.
Uquq qorçalayıcılar qayd ettiler ki, makemeci Oksana Karçevska oña 5 sene apis cezasını berdi. Lâkin Aqmescitniñ Kıyiv rayon prokurorınıñ baş yardımcısı Gülnara İbragimova bu qararğa itiraz bildirdi.
Arman ayınıñ 8-nde "Qırım Cumhuriyetiniñ Yuqarı makemesi" cezasını 8 senege qadar arttırdı, birinci 3 senesini apiste keçirmeli.
Hatırlatamız ki, keçenlerde Herson vilâyetiniñ işğalli makemesi Hersonlı faalci İrına Ğrobtsovağa üküm çıqardı. Qadın eki seneden çoq Aqmescitniñ 2. SİZOda tutula edi. "Makeme" qadınnı casuslıqta qabaatlap, 10 sene ve 6 ay apis cezasına maküm etti.
Telegram ve Facebookta Suspilne Qırım haberlerine abune oluñız
