Berim ayınıñ 2. gecesi işğalciler Kyivge kütleviy bir raketa ücümini yaptılar. Tüşürilgen parçalar AMU/QMCMDİQırım Muhtar Cumhuriyeti musulmanları diniy idaresiniñ islâm medeniyet merkeziniñ binasına zarar ketirdi. Binanıñ pencereleriniñ 90%-i zarar kördi. Şimdilik caminiñ viranelerini temizleyler. Medeniyet merkeziniñ 50-60 fayızı tamir etilmeli.
Qırım müftisiniñ ekinci muavini Vadım Daşevskıy Suspilne Qırımğa bunı añlattı.
"Binanıñ pencereleriniñ 90%-i bozulğan. Tek camide degil de, başqa kabinetlerde ve sınıflarda da tavan bozuldı. Bularnıñ episi doğrudan-doğru urulğanından degil de, pek küçlü olğan ücüm dalğasınıñ neticeleridir. Ücüm saba saat 5-ten soñ yüz berdi. 50-60 faiziniñ tamiri kerek olacaq. Tavan tüşti, onı yañıdan qurmaq kerek. Kilimlerni deñiştirecekmiz, çünki olarda çoq cam bar. Birinci qatta pencerelerni qapatmaq içün çalışamız, başqalarını ise levhalarnen qapatırmız. Cami bütünley yıqılsa bile, onıñ faaliyeti toqtatılmay", — dep Daşevskıy qayd etti.
Aynı zamanda qırımtatar halqınıñ lideri Mustafa Cemilev qayd etti ki, işğalciler 10 daqqa keçken olsa edi, qurbanlar çoq olur edi.
"Eger olar 10 daqqa keçken olsa edi, mında pek çoq ceset olur edi. Çünki bu yerde insanlar dua etmek içün toplaşalar. Mında iç bir arbiy obyekt yoq, yani medeniy obyektni maqsatnen urdılar", — dep Cemilev etti.
Bundan da ğayrı, camide viranelerni temizlev teşkilâtçılarından biri Arsen Tartan bu binada evlengenini qayd etti.
"Bu binada ayatımnıñ eñ müim vaqialarından biri — nikâh olıp keçti. Bu, islâm adetlerine köre bir evliliktir", — dep Tartan qayd etti.
O şunı da ayttı ki, qayğırmağanlar öz-özüni teşkil etüv printsipi boyunca viranelerni temizleyler.
"Birisi üçünci qatqa, birisi ekinci qatqa temizlemege ketti, birisi ise yıqılğan şeyni alıp çıqtı, birisi süpürdi. Yani, bir şey yapmaq kerek olğanını körseñ — al ve yap", — dep temizlev teşkilâtçısı qoştı
Hatırlatamız ki, bazarertesi künü, berim ayınıñ 2-nde, gece, Rusiye Kyivge kütleviy bir raketa ücümini yaptı. Paytahttaki ava mudafaası bir qaç qanatlı ve bir qaç balistik raketanı ve ücüm uçaqlarını yoq etti. İlk evelâ, bu X-101 ve KN-24/İskander-M raketaları. Parçalar dört rayonğa tüşti. Eki insan ekimlerge muracaat etti, birini hastahanege qoydılar.
Telegram ve Facebookta Suspilne Qırım haberlerine abune oluñız
