Rusiye quvetçileri, işğal etilgen Qırımdan kelgen ve saqatlı olğan altı siyasiy mabüsni FSB apishanesinde tutalar. Daa bir II dereceli saqatı olğan Qırımnıñ sakini ev apsinde tutula.
Qırımtatar Maaliy Merkezi (QMM) bunı bildirdi.
QMMniñ malümatına köre, FSB apisahnesinde aşağıdaki qırım siyasiy mabüsleri tutula:
— Zekirya Muratov – III. gruppa saqatlığı,
— Oleksandr Sizikov – I. gruppa saqatlığı,
— Timur İbragimov – III. gruppa saqatlığı,
— Servet Gaziev – II. gruppa saqatlığı,
— Amet Süleymanov – III. gruppa saqatlığı,
— Timur Yalkabov – III. gruppa saqatlığı.
QMM, II. gruppa saqatlığı olğan Remzi Kurtnezirovnıñ ev apsinde bulunğanını bildirdi.
QMM qayd etti ki, bu insanlarnıñ hastalıqları ciddiy. Sağlıqları yaramay şaraitte tutulğanı, sağlıqları aqqında şikâyetleri körmemezlikke urulğanı ve yaramay ve vaqtında tibbiy yardım kösterilmegeni sebebinden fenalaşıp tura.
"Yazıq ki, 60 yaşındaki siyasiy mabüs Cemil Ğafarov ve 61 yaşındaki Kostântın Şırınğnıñ sağlıqları fenalaşqanı içün acınıqlı aqibetler oldı. Rusiye Federatsiyası bu areketlerinen siyasiy mabüslerniñ eñ yüksek seviyeli bedeniy ve ruhiy sağlıq aqqını boza. Bundan da ğayrı, Rusiye qanunlarına köre, ağır hasta insanlar apishaneden çıqarılmalı, çünki insan ayatı — eñ yüksek qıymet, üküm ölümge çevirilmemeli", — dep QMM qayd etti.
Hatırlatamız ki, Rusiye taqiqatçısı Rostov-na-Donudaki 5. SİZOnıñ hadimlerine ve 61. tibbiy bölük hadimlerine qarşı cinaiy davanı açmağa red etti, olarnıñ ihmalkârlığından qırımtatar siyasiy mabüsi Cemil Ğafarov elâk oldı.
Telegram ve Facebookta Suspilne Qırım haberlerine abune oluñız
