Kefe yanında işğal etilgen Qırımnıñ Tepe-Oba madencilik-orman alanında 75 gektarlıq yanğın oldı. O, armannıñ 25-nde aqşam başlandı ve künniñ soñunda 45 gektarnı teşkil etti. Armannıñ 26-nda olğan malümatqa köre, yanğın alâ daa söndürilmedi. Bu yarımadada soñki 17 sene içinde eñ büyük yanğın oldı.
Rusiye Fevqulâde vaziyetler nazirligi Telegram kanalında bunı bildirdi.
Olarnıñ malümatına köre, armannıñ 26-nda saba saat 07:45-te Qırımnıñ işğalci fevqulâde vaziyetler nazirliginiñ 380 hadimi Tepe-Oba dağ sırtındaki yanğınnı söndürmege yardım ete, 105 tehnika, şu cümleden bir qaç vertolöt qullanıla. Saba deñizden 50 tonna suv çıqarıldı.
Bundan da ğayrı, "nazirlik"da qoştı ki, olar Kaygador köyünde "Volna" ve "Rassvet" bağça cemiyetleriniñ ateşke keçmesine yol bermediler. Aynı vaqıtta gece yaqında yanğın sebebinden tahminen 100 insan tahliye etildi, dep Qırımnıñ işğalci yolbaşçısı Sergey Aksönov Telegramda bildirdi.
Qırımdaki soñki yanğın, 75 gektardan çoq olğan, 2007 senesi Yalta civarındaki Üç Qoş boğazında oldı. O vaqıt yanğın 80 gektarğa tarqalğan edi.
Hatırlatamız ki, işğal etilgen Qırımnıñ Fevqulâde vaziyetler nazirligi armannıñ 25-den 28-ne qadar yarımadada fevqulâde yanğın telükesi beklenile, dep tenbilegen edi.
Qırımnıñ işğalci akimiyeti, anomal sıcaq ve qurğaqlıq sebebinden yarımadada yanğınlarnıñ sayısı keçken senege baqqanda üçte birge arttı, dep bildire.
Telegram ve Facebookta Suspilne Qırım haberlerine abune oluñız
